Papa ipeshkvijve miq të Fokolarëve: të globalizohet vëllazërimi
Terrorizmi, persekutimet kundër të krishterëve dhe pakicave të tjera, shekullarizmi,
fundamentalizmi janë disa nga sfidat, që na nxisin t’i kërkojmë me impenjim të përtërirë,
me ngulm e durim udhët, që çojnë drejt bashkimit të të krishterëve. E ndërmjet tyre,
udha kryesore është Eukaristia. Janë fjalët e shqiptuara nga Papa sot, gjatë takimit,
në Vatikan, me pjesëmarrësit e Kuvëndimit ekumenik të ipeshkvijve, miq të Lëvizjes
së Fokolarëve, përqendruar mbi temën: “Eukaristia, mister bashkimi”.
Dashuria për
Fjalën e Zotit dhe dëshira për të jetuar në përkim me Ungjillin, bëjnë që të mungullojnë
Kisha e bashkësi të ndryshme kishtare, të lindin miqësi të forta e të jetohen çaste
të vërteta vëllazërie. Duke kujtuar këtë përvojë kaq të pasur, Papa i nxiti të pranishmit
të jenë gjithnjë e më të vëmendshëm ndaj shenjave të kohës, t’i lypin Zotit dhuratën
e dëgjimit reciprok e t’i binden plotësisht vullnetit të Tij. Në botën tonë të tronditur,
nënvizoi Papa, fiton vlerë të re dëshmia e qartë e vëllazërimit si dhe ajo e bashkimit
ndërmjet të krishterëve: “Ky vëllazërim është shenjë e ndritshme dhe tërheqëse
e besimit tonë në Krishtin e Ringjallur. Nëse përpiqemi të kërkojmë, si të krishterë,
t’u përgjigjemi në mënyrë energjike problematikave e dramave të shumta të kohës sonë,
duhet të flasim e të veprojmë si vëllezër, në mënyrë të tillë, që të gjithë ta kuptojnë
lehtësish atë që themi e që bëjmë”. Edhe kjo është një mënyrë, shtoi Papa,
për t’iu përgjigjur globalizimit të indiferencës, me globalizmin e solidaritetit e
të vëllazërisë: “Fakti që në vende të ndryshme mungon liria për ta dëshmuar
publikisht fenë e edhe për ta jetuar haptas, sipas kërkesave të etikës së krishterë;
persekutimet kundër të krishterëve e të pakicave të tjera; fenomeni i trishtuar i
terrorizmit; drama e refugjatëve e shkaktuar nga luftërat e nga shumë arsye të tjera;
sfida e fundamentalizmit e, nga ana tjetër, i shekullarizmit të tejskajshëm, të gjitha
këto realitete interpelojnë ndërgjegjen tonë si të krishterë e si barinj”. Këto
sfida, shpjegoi Ati i Shenjtë, janë thirrje për të kërkuar rrugë të reja, që çojnë
kah bashkimi. E, ndër këto udhë, ajo më kryesorja, është Eukaristia si mister bashkimi.
“Në Eukaristi, përfundoi Papa, e ndjejmë thellësisht se uniteti është dhuratë e, njëkohësisht,
edhe përgjegjësi, përgjegjësi tejet e rëndë”.