Ati i Shenjtë: Kisha të mos i bëjë njerëzit të presin me vite të tëra, për të marrë
vesh nëse martesa anulohet, apo mbetet e vlefshme
Kisha të mos i bëjë të presin me vite të tëra ata, që kanë nevojë të marrin vesh nëse
martesa është anuluar, apo ka mbetur e vlefshme”. Kështu u shpreh sot Papa Françesku,
duke u takuar, në Sallën e Palit VI, në Vatikan, me pjesëmarrësit e një kursi, organizuar
nga Gjykata Rota Romake.
Shtatorin e
kaluar Papa themeloi një Komision të posaçëm studimi, për reformimin e procesit martesor
kanonik, me synim që ta thjeshtojë procedurën, duke e bërë më të shpejtë e duke mbrojtur
parimin e pazgjidhmërisë së martesës. Për këtë problem u fol edhe në Sinodin e kohëve
të fundit, kujtoi Papa, për shkaqe drejtësie. Drejtësi, vijoi Ati i Shenjtë, domethënë
që procedurat të jenë të drejta për njerëzit që presin. Sa njerëz, kujtoi, presin
me vite marrjen e një vendimi. Vija, prandaj, është ajo e mbrojtjes së drejtësisë,
pa harruar edhe atë të dashurisë së krishterë, sepse ka shumë njerëz që kanë nevojë
për një fjalë të Kishës lidhur me gjendjen e martesës së tyre, që presin një ‘po’
a një ‘jo’, por që të jetë e drejtë. Ndërsa shpesh pritja e tyre është tejet e gjatë
e, nganjëherë, edhe e rëndë aq sa njerëzit, në fund të fundit, heqin dorë. Papa citoi
një shembull nga Buenos Ajres, ku disa njerëz, për të arritur në gjykatat kishtare,
duhet të bëjnë një udhë më se 200 kilometra të gjatë: “Nuk është e mundur; nuk
mund të përfytyrohet që njerëz të thjeshtë, të zakonshëm, të shkojnë në Gjykatë: duhet
të bëjnë një udhëtim të gjatë, të humbasin ditë të tëra pune. Pastaj kjo edhe kushton.
E prandaj thonë: ‘Zoti më kupton e shkoj përpara kështu, me këtë barrë mbi shpirt’.
E Kisha Nënë duhet të bëjë drejtësi e të thotë: ‘Po, martesa jote është anuluar.
Jo, martesa është e vlefshme’. Por drejtësia kërkon që të thuhet kjo. Kështu ata mund
të shkojnë përpara pa këtë dyshim, pa këtë terratisje në shpirt”. Duhet shkuar
përpara, pra, në udhën e shpejtimit të procedurave, sepse është Kisha Nënë ajo, që
shkon t’i kërkojë bijtë e vet, për të bërë drejtësinë. Por jo vetëm: “Duhet
treguar edhe shumë vëmendje, që procedurat të mos jenë brenda kornizës së fitimit:
e nuk flas për gjëra të jashtzakonshme. Ka pasur edhe shkanduj publikë. M’u desh ta
largoj nga Gjykata një njeri, kohë më parë, që thoshte: ’10.000 dollarë e t’i bëj
që të dy: gjyqin civil e kishtar’. Ju lutem, këtë jo! Gjithnjë në Sinod, disa propozime
kërkuan që gjithçka të bëhet falas, gjë që duhet parë... Sepse kur interesat shpirërore
sulmohen nga interesat ekonomike, kjo nuk vjen nga Zoti!”. Kisha Nënë, pohoi
në përfundim Papa, ka shumë bujari për ta bërë drejtësinë falas, ashtu si falas u
shfajsuam nga Jezu Krishti. Prandaj ka shumë rëndësi të veçohet interesi shpirtëror,
nga ai ekonomik. Së fundi Ati i Shenjtë i nxiti të pranishmit të ecin përpara e të
kërkojnë gjithnjë shpëtimin e shpirtrave.