Raporti i “Ndihmë për Kishën që vuan”: liria fetare në rrezik. Të krishterët, më të
persekutuarit
U paraqit sot në shumë vende të botës, raporti i publikuar dje në Francë nga Shoqata
“Ndihmë për Kishën që vuan”, mbi lirinë fetare në botë. Nga dokumenti del qartë në
pah keqësimi i përgjithshëm i lirisë fetare. Në veçanti, të krishterët konfirmohen
si më të persekutuarit e globit, duke vijuar prirjen, që vërehet prej vitesh. Nga
196 vende të botës, 81 e pengojnë lirinë e fesë me lloj-lloj mënyrash. Madje, në 20
vende, 14 prej të cilave janë myslimane, as që ekziston në praktikë liria për ta shpallur
haptas fenë e krishterë. Në raport vihet në dukje me shqetësim prirja e Perëndimit
për ta kufizuar fenë vetëm në sferën private. Ndërkaq, shtohen rastet e antisemitizmit
dhe vetë myslimanët pësojnë dhunë nga ana e myslimanëve të tjerë, më integralistë.
Për një koment mbi këtë raport, të dëgjojmë zëdhënësen italiane të Shoqatës “Ndihmë
për Kishën që vuan”, Marta Petrosillo: “Fatkeqësisht, prirja është negative
e kjo nuk është risi e vitit 2014, sepse që prej disa vjetësh vërehet keqësimi i lirisë
fetare – pak a shumë – në të gjithë botën, natyrisht, në forma të ndryshme. Kalojmë
nga dhuna e ashpër antifetare në diskriminime të fuqishme. Në përgjithësi, vërehet
ulja e tolerancës dhe kompromentimi i pluralizmit fetar. E kjo, edhe në kontinentin
e vjetër. Të krishterët, shpesh, janë pakica më e shtypur. Në shumë vende – le të
mendojmë, për shembull, për Lindjen e Mesme, ku të krishterët jetojnë prej shekujsh
– janë sot pre e fundamentalizmit islamik. Në Evropë, ndeshemi me shtimin e episodeve
antisemite dhe antimyslimane e kjo lidhet shpesh me konfliktin israelito-palestinez”. Përgjegjësia
për ta ndryshuar këtë prirje shqetësuese, nënvizohet në Raport, u takon, së pari,
vetë bashkësive fetare. Prandaj, u bëhet thirrje të gjithë krerëve fetarë ta kundërshtojnë
fuqishëm dhunën e ushtruar në emër të fesë.