Pas tre vjetësh studimi Kapela Sikstine më në fund është gati për t’u paraqitur në
shkëlqimin e saj të plotë: mbrëmë janë ilustruar para shtypit dy impiantet e reja,
një i klimatizimit, trajtimi e ndërrimi i ajrit dhe tjetri i ndriçimit me teknologjinë
LED. “ Janë afresket e Mikelanxhelos e të piktorëve tjerë të mëdhenj që na falënderojnë”,
shpjegoi në mikrofonin e Radio Vatikanit drejtori i Muzeve të Vatikanit profesor Antonio
Paolucci, i cili nënvizoi impenjimin e Selisë së Shenjtë për ruajtjen dhe vlerësimin
e pasurisë artistike. Me fjalët e Benediktit XVI thënë me rastin e 500-vjetorit
të përurimit të kupolës së Mikelanxhelos, duam të ripohojmë “...se pasuria artistike
e Qytetit të Vatikanit përbën një lloj shëmbëlltyre të madhe, përmes së cilës vetë
Papa u flet burrave e grave nga të katër anët e botës, prej këndej, me kultura e fe
të ndryshme, njerëz që ndoshta nuk ia lexojnë kurrë fjalimet, nuk ia dëgjojnë kurrë
homelitë”. Kisha pra është e bindur që“… udha e bukurisë është e aftë t’i udhëheqë
mendjet e zemrat e njerëzve kah i Amshuari e t’i ngrejë deri në lartësitë e Zotit”. Kapela
Sikstine, pohon profesor Antonio Paolucci, drejtor i Muzeve të Vatikanit, e cila i
tërheq me një forcë të pakundërshtueshme njerëzit, mbetet objekt i dëshiruar, nga
i cili, populli i muzeve e shtegtarë, të ardhur nga të katër anët e botës, nuk mund
të heqin dorë. Nga dita, pikërisht mase pesëqind vjet më parë, kur Mikelanxhelo përuroi
qemerin e afreskuar, historia e artit në Romë, në Itali e në Evropë ndryshoi rrënjësisht.
Asgjë nuk ishte si më parë. E pikërisht Selia e Shenjtë – pohon profesor Paolucci-t
- dëshiron që mos të kufizohen në asnjë mënyrë hyrjet në këtë kryeqendër arti siç
është Kapela Sikstinë. Ndonëse, siç mendon me të drejtë Drejtori i Muzeve të Vatikanit,
numri i madh i vizituesve mund edhe ta dëmtojnë kryeveprën e papërsëritshme, e pikërisht
për këtë arsye, sot në kushte moderne ajo mbrohet nga pluhurat dhe ndotjet e tjera
me mjetet më të përparuara të teknikës, që ndërrojnë ajrin, rregullojnë temperaturën
dhe lagështirën, rregullojnë dritën duke krijuar kushtet e përshtatshme të domosdoshme
që kryevepra artistike, ardhur deri në shekullin tonë, të jetojë edhe në shekujt që
do të vijnë, dhuratë për breznitë e ardhshme, me urimin të pasohet nga kryevepra të
tjera.