Францішак: не стаяць пры дзвярах Касцёла, а быць яго “грамадзянамі”
Езус, ствараючы Касцёл,
глядзіць не на грэх чалавека, але на яго сэрца, якое жадае аздаравіць, адзначыў папа
Францішак падчас ранішняй Эўхарыстыі ў Ватыкане 28 кастрычніка 2014 г. Каментуючы
тэксты літургічных чытанняў пра заснаванне Касцёла праз пакліканне першых апосталаў,
Святы Айцец звярнуў увагу на дзейнасць Езуса, якая папярэднічала стварэнню хрысціянскай
супольнасці: напачатку Хрыстус маліўся, затым выбраў дваннаццаць вучняў і потым адправіўся
аздараўляць людзей. Паводле слоў Францішка, Езус жадае бачыць людзей унутры Касцёла,
не ў якасці гасцей ці чужынцаў, але ў якасці “грамадзян з усімі правамі”. Ён заклікаў
не глядзець на Касцёл толькі звонку – не быць хрысціянамі, якія стаяць пры дзвярах,
не ідуць далей "прахадной" Касцёла і адтуль захапляюцца ўбачанным. “Мы з’яўляемся
грамадзянамі, суграмадзянамі гэтага Касцёла”, адзначыў Папа.
Асаблівую ўвагу
Францішак звярнуў на тое, што Касцёл адкрыты для ўсіх. Нават у яго фундаменце былі
грэшнікі: ўсе да аднаго, а не толькі Юда. “Не ведаю, нават, хто з іх быў большым грэшнікам...
Юда, небарака, быў тым, хто закрыўся на любоў і таму стаў здраднікам. Але, у складаны
момант Мукі, яны ўсе ўцяклі і пакінулі Езуса. Усе былі грэшнікамі, але Ён іх выбраў”,
сказаў Папа.
Каментуючы прызначэнне св. Пятра кіраўніком Касцёла, Францішак
заўважыў, што Хрыстус глядзеў на яго сэрца, а не на грэх, але адначасова маліўся аб
яго аздараўленні. “Езус моліцца і аздараўляе, таксама кожнага з нас. Мы не можам зразумець
Касцёла, без Езуса, які моліцца і аздараўляе”, - сказаў Пантыфік і заклікаў вернікаў
прасіць Святога Духа аб ласцы разумення гэтай праўды.