Shfletojmë veprën “Traktat i devocionit të vërtetë për Marinë”, shkruar nga Shën
Luigji Maria Grignion de Monfort, ndërsa po vjen fundit i muajit të Rruzares.
Shenjti shkruan se devocioni i vërtetë për Nënën e Krishtit është: 1. shpirtëror,
2. i butë, 3. i shenjtë, 4. i paluhatshëm, 5. i pa interes. Sot, do t’ju flasim pikërisht
për këtë karakteristikë të fundit.
Në radhë të
pestë, së fundi, devocioni i vërtetë për Virgjërën e shenjtë është pa asnjë farë interesi,
domethënë, e frymëzon shpirtin të mos kërkojë vetveten, por vetëm Hyjin, në Nënën
e Tij të shenjtë. Një i devotshëm i vërtetë i Marisë nuk i shërben kësaj Mbretëreshe
auguste me frymën e fitimit a të interesit, as për të mirën e përkohshme a të amshuar,
por vetëm e vetëm sepse ajo meriton të shërbehet, e Hyji, vetëm në të: nuk e do Marinë,
sepse merr a pret prej saj të mira, por pse ajo është për t’u dashur. Prandaj e do
e i shërben besnikërisht me gjithë shpirt, si kur ndjehet i trazuar e i zbrazët, ashtu
edhe kur zemra i mbushet me ëmbëlsi e zjarr feje; e do, si në Kalvar, ashtu edhe në
Dasmën e Kanës. Oh! Sa i çmuar është para syve të Hyjit e të Nënës së Tij të shenjtë,
një i devotshëm kësisoji, që nuk kërkon asgjë për vete, kur i shërben asaj. Po sa
i rrallë është sot! E që të mos jetë më kaq i rrallë e mora pendën në dorë për të
shkruar çka mësova me fryt publikisht e privatisht për shumë vjet në misionet e mia.