Սուրբ Պօղոս կորնթացւոց հասարակութեան կ՛ըսէ. «Խաչին լեզուն յիմարութիւն է անոնց համար,
որ կը կորսուին, բայց անոնց համար, որ կը փրկուին, խաչը Աստուծոյ զօրութիւնն է» (1 Կոր.
1,18): Մեր Եկեղեցին այսօր կը կատարէ, «Գիւտի Սրբոյ Խաչի» տօնը, որ պատմական դէպքի
մը յիշատակումն է: Քրիստոնէութեան սկիզբէն ի վեր բոլոր գանձերու մէջէն ամէնէն թանկարժէքը
երեք դարերէ ի վեր հողին տակ ծածկուած կը մնար: Ան մեր պաշտելի Փրկչին խաչափայտն էր,
որ ըստ աւանդութեան Գողգոթայ լերան տակը թաղուած կը մնար` ճիշտ տեղն ալ անյայտ: Տակաւին
ոչ ոք համարձակած էր զայն փնտռել` քրիստոնէութեան դէմ հռոմէական կայսրութեան յարուցած
հալածանքներու պատճառով: Երուսաղէմ, 326-ին, Սրբուհի Հեղինէ, Մեծն Կոստանդիանոսի
(275-337) մայրը, մինչ ուխտով կ՛երթար Ս. Վայրերը այցելելու դիտումով` իր առաջին մտածումը
եղաւ գտնել այդ անգին գանձը: Պատմագրին համաձայն, փնտռտուքի ժամանակ երեք խաչեր
ի յայտ կու գան, որոնցմէ երկուքը, ինչպէս գիտենք աւետարաններէն, կը պատկանին աւազակներուն,
որոնք խաչուեցան Քրիստոսի աջ եւ ձախ կողմերը: Հետեւաբար, իմանալու համար գտնուած երեք
խաչափայտերէն այն մէկը, որուն վրայ խաչուեցաւ Յիսուս Քրիստոս` նոր մեռած պատանիի մը մարմինը
դպցուցին երեք խաչափայտերուն: Անոնց վերջինին հպումին` պատանին վերակենդանացաւ Սրբուհի
Հեղինէի ներկայութեամբ, զոր այս վերջինը (Սրբուհի Հեղինէ) Քրիստոսի խաչափայտը զետեղեց
«Ս. Յարութիւն» իր կառուցած տաճարին մէջ: Խաչափայտը գտնողը եղաւ Յուդա անունով հրեայ
պատմագէտ մը, որ գիւտէն եւ հրաշքէն շանթահարեալ` ընդունեցաւ քրիստոնէութիւնը: Ապագային
դարձաւ Ս. Քաղաքին նշանաւոր Ս. Կիւրեղ Պատրիարքը, որուն օրով լուսաճաճանչ խաչը 351-ին
տեսնուեցաւ երկնակամարին վրայ: Քրիստոսի խաչափայտին գիւտը էական է մեզի համար, որովհետեւ
Քրիստոս այդ խաչին վրայ իր անգին արիւնը թափեց ի քաւութիւն մեր մեղքերուն: Սոյն պատճառին
համար ալ քրիստոնեաներս եւ յատկապէս հայ ժողովուրդը դարերու ընթացքին մեծ պաշտամունք
մատուցած է Խաչին: Խաչը, որ ատենօք անարգանքի գործիք մըն էր չարագործները պատժելու
համար, Յիսուսի մահէն ետք դարձաւ յարգանքի, մեծարանքի եւ երկրպագութեան առարկայ: Խաչը
ոմանց համար կրնայ ըլլալ յիմարութիւն է, ինչպէս կ՛ըսէ սուրբ Պօղոս կորնթացւոց, սակայն
հաւատացեալներուս համար խաչը` Աստուծոյ զօրութիւնն է, մեր փրկութեան խարիսխը, զէն փրկութեան: Խաչը`
մեր կեանքին մէջ զարդ մը չէ, որ կարելի է ամէն վայրկեան զայն հանել եւ դնել: Խաչին կեանքը
նախապայմանն է ճշմարիտ քրիստոնեային համար: Յիսուս ըսաւ. «Ան որ իր խաչը չ՛առներ եւ ինծի
չի հետեւիր արժանի չէ ինծի»: հետեւաբար, Քրիստոսի հետեւելու էական պայմանը` խաչն է, խաչ
առնելն է: Խաչը սիրոյ, նուիրումի, համեստութեան եւ խոնարհութեան կեանքն է: Խաչը նամանաւանդ
զոհողութեան խորհրդանիշ է: Մենք այսօր, յանձն չենք առներ դոյզն իսկ զոհողութիւն, կ՛ուզենք
ունենալ ամէն ինչ առանց ջանք թափելու, առանց պայքարի` պատրաստ եւ անվճառ: Ի՞նչ կը հասկնանք
զոհողութիւն ըսելով: Երբ ագահն` իր առողջութիւնը կը զոհէ` քսակն աւելի լեցնելու, ասիկայ
խաչի կեանք չէ, այլ յիմարութիւն է: Երբ մեծահարուստ մը իր ամբողջ ունեցածը, կամ մեծ մասը,
պատիւներու, փառքի, տիտղոսի, դիրքի եւ աստիճանի համար կը զոհէ, ասիկայ խաչի կեանք չէ,
այլ յիմարութիւն է: Իրական զոհը բոլորովին տարբեր բան մըն է: Իսկական զոհը երբ մարդ մը
գաղափարականի մը, նպատակի մը համար կը նուիրուի: Երբ մարդը իր կեանքը, իր առողջութիւնը,
իր քունը, իր դրամը կը զոհաբերէ գիտութեան, հայրենիքի վերելքին, եւ կրօնքի համար, ասիկայ
իսկական զոհողութիւն է: Սակայն մեր կատարած զոհերը որպէս զի իրական զոհ ըլլան եւ
արժէք ներկայացնեն բան մըն ալ պէտք է: Ի՞նչը կը պակսի: Զոհողութեան իսկական հոգին, որ
սրտէն կը փխի: Մեր զոհողութիւնները` նեղուածի, տանջուածի, երկիւղի ու դժկամակի հոգիով
եւ կերպարանքով պէտք չէ գործուին: Իսկական զոհողութիւնը հաճութեան եւ ուրախութեան մէջն
է: Եւ հաճութիւնը եւ ուրախութիւնը չի գար եթէ սէր չկայ: Սէրը կը ստիպէ զոհողութիւն ընելու:
Ով որ ուրախութեամբ կը զոհաբերէ, այնպիսին զուր տեղ ուրախացած չէ: Աստուած ալ անոր հետ
եւ անոր համար կը խնդակցի: Ամէն