Пасланне Сінода Біскупаў да Божага народа паказвае прыгажосць сям’і
Пасланне ІІІ Надзвычайнай
сесіі Сінода Біскупаў да Божага народа паклікана даць новае натхненне і надзею, паказаць
багацце, прыгажосць і ззянне сям’і. Яно скіравана да ўсіх сем’яў свету, але асаблівым
чынам да хрысціянскіх. Дакумент быў прадстаўлены 18 кастрычніка 2014 г. кардыналам
Джанфранка Равазі, старшынёй Папскай рады па культуры, і кіраўніком спецыяльнай камісіі,
якая займалася яго падрыхтоўкай. У адрозненні ад папярэдніх падобных пасланняў, гэта
– вельмі кароткае, напісанае простай, а часам сімвалічнай мовай. Асноўная канкрэтная
інфармацыя аб працы асамблеі будзе змешчана ў справаздачы Сінода – “Relatio Sinodi”
– дакуменце, зацвярджэнне якога запланавана на вечар 18 кастрычніка, удакладніў ватыканскі
пурпурат. “Сужэнская любоў, адзіная і непарыўная, якая існуе нягледзячы на шматлікія
цяжкасці, звязаныя з чалавечай абмежаванасцю – гэта адзін з самых прыгожых цудаў”,
але таксама “найбольш супольных”, гаворыцца ў пасланні. Сінадальныя айцы выказалі
падзяку за “вернасць, веру, надзею і любоў, якія сем’і даюць свету”.
Напачатку
дакумента удзельнікі асамблеі засяродзіліся на складанай рэчаіснасці, у якой жывуць
сем’і, выкліках і драматычных выпрабаваннях. Першы з іх – сужэнская вернасць, якой
пагражаюць індывідуалізм, аслабленне веры, адсутнасць церпялівасці, прабачэння, узаемнага
прымірэння, ахвярнасці. У выніку падзенняў нараджаюцца “новыя адносіны, новыя пары,
новыя саюзы і новыя сужэнствы, што ствараюць складаныя і праблематычныя для хрысціянскага
выбару сямейныя сітуацыі”, з жалем адзначылі сінадальныя айцы.
Сярод выклікаў,
на якія вымушаны адказваць сем’і: цяжкасці, звязаныя з клопатам пра дзяцей з абмежаванымі
магчымасцямі, хваробы, старасць, смерць блізкіх людзей, эканамічныя цяжкасці, выкліканыя
“грашовым фетышызмам”. Сінадальныя айцы ўзгадалі пра праблемы бацькоў, пазбаўленых
магчымасці працаваць – “бяссільных перад першаснымі патрэбамі сям’і”; пра праблемы
моладзі, якая становіцца здабычай наркотыкаў ці крыміналу; пра драму бежанцаў, ахвяраў
канфліктаў і рознага роду злоўжыванняў. У пасланні гучыць заклік, скіраваны да кіраўніцтва
краін і міжнародных арганізацый, бараніць правы сем’яў.
У той жа час, у дакуменце
ўзгадваецца пра “святло”, што ззяе ў шматлікіх сем’ях: досвед сустрэчы з узаемнай
адкрытасцю, важнасць перыяду заручынаў і падрыхтоўкі да сужэнства, у якім прысутнічае
“сексуальнасць, пяшчота, прыгажосць”. Сужэнская любоў распаўсюджваецца праз “плоднасць
і нараджальнасць”, якія важна разумець не толькі ў пракрэатыўным сэнсе, але і як дараванне
Боскага жыцця праз хрост, катэхізацыю і перадачу каштоўнасцяў.
На заканчэнне
пасланне падкрэсліваецца важнасць супольнай малітвы ў сям’і, навучання веры і святасці,
блізкасці да “апошніх, маргіналізаваных, бедных, самотных, хворых, чужынцаў”. У дакуменце
адзначаецца, што ўдзельнікі “першага этапу сінадальнага шляху разважалі над душпастырскім
суправаджэннем і магчымасцю прыступаць да сакрамэнтаў разведзеных, якія жывуць у новых
саюзах”.