വിയറ്റ്നാം പ്രധാനമന്ത്രി
പാപ്പാ ഫ്രാന്‍സിസിനെ സന്ദര്‍ശിക്കും
15 ഒക്ടോബര്‍ 2014, വത്തിക്കാന്വിയറ്റ്നാം പ്രധാനമന്ത്രി നയെന്‍ താന്‍ ഡൂങ് പാപ്പാ ഫ്രാന്‍സിസിനെ സന്ദര്‍ശിക്കും.
ഒക്ടോബര്‍ 18-ാം തിയതി ശനിയാഴ്ചയാണ് വത്തിക്കാനുമായി നയതന്ത്ര ബന്ധത്തില്‍ ഇനിയും ഒന്നിക്കാത്ത വിയറ്റ്നാമിന്‍റെ സോഷ്യലിസ്റ്റ് നേതാവ്, നയെന്‍ താന്‍ ഡൂങ് പാപ്പാ ഫ്രാന്‍സിസുമായി കൂടിക്കാഴ്ചയ്ക്കെത്തുന്നത്.
2007-ലും 2009-ലും മുന്‍പാപ്പാ ബനഡിക്ടുമായി കൂടിക്കാഴ്ച നടത്തിയിട്ടുള്ള
ഹാനോയ് സര്‍ക്കാരിന്‍റെ തലവന്‍, വീണ്ടും പാപ്പാ ഫ്രാന്‍സിസുമായി കൂടിക്കഴ്ചയ്ക്കെത്തുന്നത് വത്തിക്കാന്‍-വിയറ്റനാം ഉഭയകക്ഷി ബന്ധത്തിന്‍റെ ശ്രദ്ധേയവും പ്രത്യാശ പകരുന്നതുമായ നീക്കമാണെന്ന്,
പാപ്പായുടെ ദ്വിഭാഷിയായ, വത്തിക്കാന്‍ റേഡിയോ വിയറ്റ്നാം വിഭാഗത്തിലെ ഫാദര്‍ ജോസഫ് കഗേം പ്രസ്താവിച്ചു.
മലേഷ്യ-സിങ്കപ്പൂര്‍ രാജ്യങ്ങളിലെ വത്തിക്കാന്‍റെ സ്ഥാനപതി, ആര്‍ച്ചുബിഷപ്പ് ലിയൊപ്പോള്‍ഡ് ജിരേലിയെ 2011-ല്‍ വിയറ്റ്നാമിന്‍റെകൂടി സ്ഥാനപതിയായി നിയമിക്കുകയുണ്ടായെങ്കിലും, വത്തിക്കാന്‍-വിയറ്റനാം നയതന്ത്രബന്ധങ്ങള്‍ ചര്‍ച്ചകളായി മാത്രം തുടരുകയാണെന്നും, ഫാദര്‍ കാഗേം വെളിപ്പെടുത്തി.
ഇറ്റാലിയന്‍ പ്രധാനമന്ത്രി മത്തെയൊ റെന്‍സിയുടെ ക്ഷണപ്രകാരം
മിലാനിലെ ഏഷ്യ-യൂറോപ്പ് സമ്മേളനത്തില്‍ പങ്കെടുക്കുവാനെത്തുന്ന ഡൂങാണ് പാപ്പായുമായുള്ള കൂടിക്കാഴ്ചയ്ക്കുള്ള താല്പര്യം പ്രകടിപ്പിച്ചത്.
നയെന്‍ താന്‍ ഡൂങ് ബെല്‍ജിയം, ജര്‍മ്മനി എന്നീ രാജ്യങ്ങളും ഇക്കുറി സന്ദര്‍ശിക്കുമെന്നും വത്തിക്കാന്‍ റേഡിയോ വക്താവ് ഫാദര്‍ കാഗേം വെളിപ്പെടുത്തി.
| All the contents on this site are copyrighted ©. |