Papa Françesku falënderon Presidentin Nishani për mikpritje dhe vlerëson popullin
shqiptar si pasuri për Evropën
Përmes një mesazhi falënderimi të dërguar në adresë të Presidentit të Republikës
së Shqipërisë Bujar Nishani, Papa Françesku shpreh mirënjohje për kreun e shtetit
shqiptar, autoritetet e vendit dhe mbarë popullin shqiptar për mikpritjen e ngrohtë
dhe elegante gjatë vizitës së tij në vendin tonë. Ati i Shenjtë Bergoglio thekson
se “populli shqiptar në saje të forcës dhe rezistencës së tij në kohë vuajtjesh si
dhe të gjallërisë rinore, përfaqëson një pasuri për mbarë kontinentin evropian”. “Zoti
President, në vazhdën e Udhëtimit tim të paharrueshëm Apostolik, dëshiroj t’ju shpreh
edhe një herë Ju, autoriteteve të tjera si dhe mbarë popullit shqiptar, mirënjohjen
time nga zemra për mikpritjen e ngrohtë dhe elegante që më ofruat mua dhe atyre që
më shoqëronin. U kënaqa që nëpërmjet pranisë sime munda të tregoj afërsinë time si
dhe të gjithë Kishës me popullin e Shqipërisë, i cili në saje të forcës dhe rezistencës
së tij në kohë vuajtjesh si dhe të gjallërisë rinore, përfaqëson një pasuri për mbarë
kontinentin evropian.”- thuhet në mesazhin e Atit të Shenjtë. “Zoti President,
nëpërmjet lutjeve ushqej shpresën time që ju dhe qytetarët tuaj do të jetoni me drejtësi,
në paqe dhe vëllazëri dhe do të vazhdoni të dëshmoni në mënyrë mbresëlënëse marrëdhëniet
tuaja të respektueshme mes pjesëtarëve të bashkësive të ndryshme fetare. Do të vazhdoj
të lutem për ju si dhe për aspiratat tuaja për përparim të mirëfilltë si dhe t’ju
kërkoj lutjet tuaja për mua. Vëllazërisht, Françesku”- përfundon mesazhi i Papa Franceskut.