Հայաստանի Թեմի հոգևորականները Իտալիայում մասնակցել են քահանայական պատրաստութեան դասընթացի
2014թ. սեպտեմբերի 30-ից հոկտեմբերի 4-ը Ամենապատիւ Տէր Ներսէս Պետրոս ԺԹ Կաթողիկէ Հայոց
Կաթողիկոս Պատրիարքի օրհնութեամբ Հռոմից քիչ հեռու գտնուող Սանթա Մարինելլա բնակավայրում
կազմակերպուեց քահանայական մնայուն կազմաւորման դասընթաց՝ Հայ Կաթողիկէ Եկեղեցու 5-10
տարեկան քահանայական ձեռնադրութեամբ հոգևորականների համար: Դասընթացին մասնակցել է 12
հոգևորական՝ 5 վարդապետ և 7 ամուսնացեալ քահանայ՝ Հայաստանից, Վրաստանից, Ռուսաստանից,
Սիրիայից, Լիբանանից և Յունաստանից: Դասընթացը նախաձեռնել էր Հայ Կաթողիկէ Պատրիարքարանը:
Այն իր տեսակով առաջինն է Հայ Կաթողիկէ Եկեղեցու պատմութեան մէջ և, ինչպէս խոստանում
են կազմակերպիչները, լինելու է շարունակական, նաև՝ այլ հոգևորականների համար, ովքեր ունեն
տարբեր տարիների քահանայական ձեռնադրութիւն: Դասընթացի թեմաները կենտրոնացած են եղել
քահանայական կոչմանը հաւատարիմ մնալու հոգևոր պարտականութեան, քահանայական կոչման և ծառայութեան
հետ կապուած խնդիրների, ինչպէս նաև ծիսակատարութեան թեմաների շուրջ: Դասախօսութիւնների
համար հրաւիրուած են եղել Յիսուսեան միաբան Էմմիլիո Մագանիան, ով Հռոմում պատրաստում
է նմանատիպ դասընթացներ անցկացնող հոգևորականների, Պոլսի Առաքելական Կառավարիչ, հայագէտ
Գերշն. Տ. Լևոն Արքեպս. Զեքիյանը, Լիոնի հայ կաթողիկէների ժողովրդապետ Գերյարգելի Հ.
Յովսէփ ծ.վ. Քելեկյանը: Դասընթացի բացման իր խօսքում Հոգևոր Տէրն ասել է, որ քահանան
իր հոգևոր ծառայութեան մէջ իր անձնական ձեռագիրը չպէտք է հետապնդի, այլ ամեն ինչ պիտի
անի իր առաջնորդի գիտակցութեամբ և հաւանութեամբ, այն ժամանակ Աստուած կօրհնի նրա առաքելութիւնը
և հաւատացեալները կշինուեն հոգևորապէս: Քահանայական մնայուն պատրաստութեան այդ հաւաքի
նպատակը, Հոգևոր Տիրոջ խօսքերով, վերանորոգելն է քահանայութեան կոչումը՝ հետևելու Յիսուսին,
Նրա փրկչական գործը շարունակելու, որը կը յաջողուի ոչ թէ գիտելիքների մեծ քանակութեամբ,
այլ՝ առաջին հերթին խոնարհութեամբ և Աստուծոյ հանդէպ վստահութեամբ: Հոգևոր Տէրը յորդորել
է քահանաներին լինել Յիսուսի ընկերը մշտական աղօթքներով և խոնարհութեամբ: Դասընթացի ընթացքում
կարևորուել է քահանայի կողմից իր հոգևոր կատարելագործման վրայ մշտապէս ջանք թափելը, սեփական
հոգևոր կատարելագործման յստակ ծրագրի մշակումը՝ անդադար փորձելով հասկանալ սեփական թերութիւններն
ու աշխատելով շտկել դրանք: Դասընթացի մասնակիցները դասախօսողների հետ միասին խմբային
աշխատանք են կատարել՝ փոխանակելով սեփական փորձառութիւնը տարբեր խնդիրների լուծման վերաբերեալ,
որոնք հանդիպում են քահանայական ծառայութեան ընթացքում: Այս իմաստով նման դասընթացը ունի
երկակի կարևորութիւն քահանայի համար՝ հոգևոր գիտելիքների հարստացում մասնագիտական դասալսումներով
և փորձի փոխանակման լաւ հնարաւորութիւն: Քահանայական մնայուն պատրաստութեան այդ դասընթացի
մասնակիցները վստահ են, որ իրենց հաջողուեց այդ մի քանի օրերի ընթացքում ձևաւորել ջերմ
մտերիմ յարաբերութիւններ միմեանց միջև: Դասերից բացի քահանաները միասին ներկայ են գտնուել
Սրբազան Քահանայապետի ընդհանուր ունկնդրութեանը, միասին այցելել են Հռոմում և Հռոմից
դուրս գտնուող սրբավայրեր, իսկ դասընթացի աւարտին՝ Նեապոլի Սբ. Գրիգոր Լուսավորիչ եկեղեցի
ու մայրապետաց վանք, որտեղ աղօթել են Սբ. Գրիգոր Լուսավորչի գանգի առջև: Ինչպէս յայտնի
է, Սբ. Գրիգոր Լուսավորչի գանգը պահւում է Նեապոլի մայրապետների մի վանքում, որտեղ նախկինում
ապրել են հայ միանձնուհիներ: Վանքի փողոցը ևս կոչւում է Սբ. Գրիգոր Լուսավորչի անունով:
2001թ. Հայաստանում քրիստոնէութեան որպէս պետական կրօն հռչակման 1700-ամյակի առիթով Սբ.
Յովհաննէս Պօղոս Բ Պապը Նեապոլում պահուող Լուսավորչի մասունքների մի մասը նուիրեց Հայ
Առաքելական Եկեղեցուն: