Ju kumtojmë lajmin e mirë”: leximi i Ungjillit të Markut
Në rubrikën “Ju kumtojmë lajmin e mirë”, vijojmë leximin e kapitullit të gjashtë të
Ungjillit sipas Markut, sot vargjet 30-44.Kjo pjesë ungjillore,
që njihet si tregimi i “shumimit të bukëve”, në të vërtetë është tregimi i lidhjes
së thellë të njerëzve me Jezusin e anasjelltas. Nxënësit janë kthyer nga misioni (i
lajmëruar në vargjet 6-13) dhe Jezusi i fton të rrinë vetëm me të. Kemi të bëjmë me
dy qëndrimet kryesore të Kishës: hapja ndaj të gjithëve (misionariteti) dhe kthimi
tek themeli i saj i vërtetë, që është Krishti. Kisha, që di të dalë nga vetvetja në
emër të Jezusit, di edhe të kthehet gjithmonë tek Jezusi. Kthimi i saj tek Biri i
Hyjit, megjithatë, nuk do të thotë tërheqje e plotë nga bota. Njerëzit nuk e lënë
të qetë një Kishë, në të cilën Jezusi është vërtet i pranishëm: “Në të vërtetë, aq
shumë njerëz vinin e shkonin, saqë nuk kishin kohë as të hanin” (v.31), prandaj, sado
që Kisha të përpiqet të ikë nga bota, për të ndenjur me Jezusin, aq më shumë bota
do ta kërkojë Kishën. Dhe ashtu ndodh në këtë fragment të Ungjillit sipas Markut.
Pasi apostujt largohen me Jezusin në varkë, “Kur po zbrisnin nga varka, Jezusi pa
një turmë të madhe, e cila iu dhimbs, sepse ishin si delet pa bari” (v.34). Shpesh
herë Kisha ankohet pse njerëzit nuk e kërkojnë më. Sigurisht, ideologjitë e kësaj
bote i çorodisin njerëzit dhe i largojnë nga bashkësia kishtare, por Kisha duhet ta
pyesë veten: a është Jezusi brenda saj? Ai Jezus, që i shikon njerëzit me dhembshuri,
sepse e di se janë si delet pa bari. Ai Jezus, që është Bariu i mirë, i cili jep jetën
për delet e veta. Njeriu i të gjitha kohërave ka nevojë për këtë Jezus dhe e kërkon
gjithmonë. Kisha duhet ta dijë se Jezusi është në qendër të saj, por ai nuk është
aty vetëm për kishën. Ai ka ardhur për të gjithë, prandaj edhe ajo vetë duet të jetë
Kishë për të gjithë. Tundimi i bashkësisë së krishterë për t’i ndarë njerëzit nga
Biri i Hyjit është i hershëm. Marku na tregon se, pasi Jezusi i mësoi të pranishmit
për shumë gjëra, apostujt iu afruan e i thanë: “Vendi është i shkretë dhe është vonë.
Lëri të shkojnë nëpër fshatrat dhe fushat përreth, që të blejnë diçka për të ngrënë”
(v.36). Por Jezusi dëshiron që Kisha e tij të lidhet me fatet dhe me gjendjen e njeriut
ashtu siç është lidhur ai vetë me të gjithë njerëzit dhe me çdo njeri në misterin
e mishërimit. Mishërimi i Krishtit prek thellë natyrën e Kishës, prandaj Jezusi u
drejtohet apostujve e u thotë: “Jepuni ju të hanë” (v.37). Kisha tregon se është e
lidhur me Jezusin vetëm nëse lidhet ngushtë me njerëzit e me fatet e tyre. Asnjë arsye
nuk duhet të jetë e mjaftueshme për t’u ndarë nga njerëzit, as nevoja e pandehur që
mund të kenë ata për t’u ushqyer. Ajo vetë duhet të gjendet e gatshme, për t’u dhënë
ushqimin që ka falë bashkimit me Krishtin:Eukaristinë, për të cilën do të flasim në
numrin e ardhshëm të rubrikës sonë.