Sinodi: familja në botën bashkëkohore është tema e zgjedhur nga Papa Françesku
për vitin e ardhshëm
Nisi sot në Vatikan java e dytë e punimeve të Sinodit të jashtëzakonshëm të ipeshkvijve
për familjen. “Thirrja e misioni i familjes në Kishë në botën bashkëkohore” do të
jetë tema e Sinodit të rregullt që do të zhvillohet nga 4 deri më 25 tetor 2015. Kështu
ka vendosur Papa Françesku. Tema u njoftua
nga sekretari i përgjithshëm i sinodit, kardinali Lorenzo Baldisseri, në praninë e
Papës, në hapje të punimeve të javës së dytë të sinodit të jashtëzakonshëm mbi familjen
(5 -9 tetor 2014). “Tema u shpall sot, tha kardinali Baldisseri para pjesëmarrësve,
pasi relatori kryesor i sinodit, kardinali Erdo, lexoi relatio post disceptationem
(ligjëratën e pas diskutimeve), që në diskutimet e sotme e të kësaj jave ta keni në
konsideratë edhe këtë temë të ardhshme. Duhet të shikojmë më larg, shtoi kardinali
Baldisseri, në mënyrë që qysh tani në diskutimet e grupeve të vogla, mund të sugjeroni
tema që nuk janë trajtuar apo që duhen trajtuar rreth familjes. Tani është rasti për
t’i propozuar argumentet në mënyrë që në asamblenë e ardhshme të mund të punohet
edhe mbi ato argumente që meritojnë e që nuk janë trajtuar për familjen”. Durim
e delikatesë për familjet në vështirësi. Jo zgjidhjeve unike apo sipas logjikës “gjithçka
apo asgjë”: ky është me pak fjalë reflektimi i “Ligjëratës pas diskutimeve” të Sinodit
të jashtëzakonshëm kushtuar familjes, që u paraqit sot paradite në Sallë nga Relatori
i përgjithshëm, Kardinali Erdo. Punimet e etërve sinodalë sot vijuan nëpër grupe
të vogla me diskutime e sugjerime të ndryshme të rreth familjes në Kishë. “Nga Sinodi
del qartë nevoja e përcaktimeve të guximshme baritore” nga ana e Kishës, me një kujdes
të veçantë ndaj “familjeve që janë të goditura nga plagë të ndryshme, ndaj familjeve
të ndara, të divorcuara, atyre që janë martuar për të dytën herë e me probleme tjera”.
Të kesh “një qëndrim e ndjeshmëri të re baritore, që sot kërkohet, do të thotë t’i
shohësh, t’i vlerësosh aspektet pozitive edhe të martesave civile e, pas një shqyrtimi
të domosdoshëm, edhe ato të bashkëjetesave”, nënvizoi relatori i Sinodit, kardinali
Peter Erdo. “ Lypet pra – shpjegoi ai – që në propozimin kishtar, të cilin duhet prezantuar
qartë si idealin me të lartë, t’i përmendim edhe elementet pozitive që ekzistojnë
në ato situata familjare që nuk i përgjigjen akoma, apo jo më, një ideali të tillë”,
siç e ka Kisha. Në shumë situata familjare jo të rregullta, apo kritike, duhet t’i
kërkojmë vlerat e vërteta familjare apo së paku dëshirën e synimit për to. Prandaj
lypet që Kisha në veprimtarinë e saj baritore të niset gjithmonë nga aspektet pozitive”
të mundshme, pohoi kardinali Erdo. Sinodi i ipeshkvijve mbi familjen është i vetëdijshëm
për domosdoshmërinë e gjetjes së një gjuhe më të përshtatshme për t’ia kumtuar “Ungjillit
familjes” e sinjalizon këtë nevojë sidomos në momentin në të cilin do të duhet të
ballafaqohet me “situatat baritore më urgjente”. Nevojitet të shmanget rreziku që
kumtimi, megjithëse korrekt, të shuhet “në detin e fjalëve që karakterizojnë shoqërinë
tonë”, tha kardinali Erdo. “Kthimi – pohoi relatori i përgjithshëm i Sinodit, duke
lexuar ‘relatio post disceptationem’ në Kongregacionin e përgjithshëm të paradites,
ku ishte i pranishëm edhe Papa – para se gjithash duhet të jetë ai i gjuhës, në mënyrë
që të rezultojë vërtetë domethënës”. “Nuk bëhet fjalë – pohoi kardinali Peter Erdo
– vetëm për paraqitjen e një rregullore, por për propozimin e vlerave, duke respektuar
nevojat e atyre që sot kanë edhe në vendet më të shekullarizuara”. Këtë javë diskutimi
rreth familjes vazhdon, pastaj etërit sinodalë do të votojnë tekstin përfundimtar
të “relatio Synodi” të rregullt që do të mbahet nga 4 deri më 25 tetor 2015 mbi temën:
“Thirrja e misioni i familjes në Kishë e në botën bashkëkohore”. Një udhë e gjatë,
e hapur, që bëhet së bashku si shprehje e bashkësive të krishtera.