Papa në vigjiljen e Sinodit: Kisha e shoqëria të risohen nga diskutimet për familjen
Kisha e shoqëria të risohen, duke dëgjuar diskutimet e rrahjen e mendimeve në Sinodin
për Familjen, e cila të shihet me sytë e Krishtit. Papa Françesku shprehu këtë shpresë
në Lutjen e djeshme të mbrëmjes në Sheshin e Shën Pjetrit, në festën e shën Françeskut,
me mëse 40 mijë besimtarët e mbledhur rreth tij për t’i uruar punë të mbarë mbledhjes
së jashtëzakonshme të ipeshkvijve me temë “Sfidat baritore për familjen, në kuadrin
e ungjillëzimit”. Edhe në kulturën e sotme individualiste, nënvizoi Ati i Shenjtë,
çdo njeri e ndjen nevojën për një portë të hapur, për dikë që e pret e ndan me të
jetën, historinë, për dikë që e dëgjon. Kjo është familja: “Bashkimi
i jetës, pranuar nga bashkëshortët, hapja e tyre ndaj dhuratës së jetës, ruajtja e
njëri-tjetrit, takimi e kujtesa e brezave, edukimi, transmetimi i fesë së krishterë
tek bijtë...: me të gjitha këto, familja vazhdon të jetë shkollë e pashoqe humaniteti,
kontribut i domosdoshëm për një shoqëri të drejtë e solidare”. Se cila është
familja, që i jep jetë botës, pavarësisht nga problemet e përditshme të saj, e treguan
dëshmitë, që jehuan në sheshin para Bazilikës së Vatikanit, ndërsa dielli perëndonte
pas kupolës së mirënjohur. Dy të fejuar drejt martesës; dy prindër me katër fëmijë
e me tre të tjerë, që siç thanë vetë, “fluturuan në qiell vetëm pas 10 muajsh shtatzanie”
e që pavarësisht nga kjo, kanë marrë në ngarkim një vajzë të vogël në nevojë, të cilën
e konsiderojnë tashmë bijën e tyre në shpirt; një çift tjetër, bashkuar sërish nën
një kulm, pas gjashtë vjetësh ndarjeje. Këto janë familjet, në qendër të Sinodit të
jashtëzakonshëm, dëshiruar nga Papa pikërisht për t’iu përgjigjur aspiratave e problemeve
të sotme familjare. E Ati i Shenjtë u tregoi atyre Ungjillin, Fjalën e Zotit, e vetmja
që plotëson nevojat më të thella të njeriut, ndërsa etërve sinodalë, Krishtin: “Sepse,
nëse vërtet dëshirojmë t’i verifikojmë hapat tona në terrenin e sfidave bashkohore,
kushti vendimtar është ta mbajmë vështrimin të ngulur në Jezu Krishtin, të kundrojmë
e të adhurojmë Fytyrën e Tij. Nëse do ta bëjmë tonën mënyrën e tij të mendimit, të
jetesës e të krijimit të marrëdhënieve me të tjerët, do ta kemi të lehtë t’i shndërrojmë
punimet sinodale në udhëzime e rrugë për baritorinë e njeriut e të familjes”. Vërtet,
shpjegoi Papa Françesku, sa herë kthehemi në burimin e përvojës së krishterë, pra
në Krishtin, hapen rrugë të reja e mundësi të pamenduara, sipas shembullit të udhëzimit
ungjillor të Zojës në Dasmën e Kanës, “Bëni ç’u thotë Ai”. Është testamenti shpirtëror
i Marisë, theksoi Ati i Shenjtë: “Dëgjimi e konfrontimi mbi familjen, dashur
e parë me sytë e Krishtit, do të kthehen kështu, në një rast fatlum për të risuar
– sipas shembullit të Shën Françeskut – Kishën e shoqërinë. Me gëzimin e Ungjillit,
do të rigjejmë një Kishë të pajtuar e të mëshirshme, të varfër e mike me të varfërit;
një Kishë, në gjendje të kapërcejë me durim e dashuri vuajtjet e vështirësitë, që
i vijnë si nga brenda, ashtu edhe nga jashtë”.