Ватыканскі іерарх: св. Францішак заклікае да галоўнага – зрабіць Евангелле жыццёвым
правілам
З нагоды ўспаміну
св. Францішка, які Касцёл адзначае 4 кастрычніка, сакратар Кангрэгацыі па справах
Інстытутаў кансэкраванага жыцця і Таварыстваў апостальскага жыцця арцыбіскуп Хасэ
Радрыгес Карбальё, нагадаў, што ў свой час “бедняк з Асізі” атрымаў ад Хрыста заданне
– аднавіць Касцёл. “Але якім чынам? Вяртаючыся да жыцця пазначанага Евангеллем. Св.
Францішак кажа Касцёлу сёння, як і ў мінулым, аб неабходнасці вяртання да Евангелля
– неабходнасці вярнуцца і паставіць у цэнтр жыцця Езуса”, - сказаў іерарх у інтэрв'ю
Ватыканскаму радыё. Ён падкрэсліў, што для св. Францішка, Евангелле не было кнігай
або ідэалогіяй, але асобай – Хрыстом і формай жыцця. “Я думаю што пасланне св. Францішка
заключаецца менавіта ў гэтым: вярнуцца да Евангелля, зрабіць з яго жыццёвую рэгулу
кожнага хрысціяніна і самаго Касцёла”, сказаў іерарх, які сам з’яўляецца францішканінам.
На
думку арцыбіскупа Карбальі, гэты заклік аб гучыць сёння таксама праз сведчанне папы
Францішка – езуіта, які абраў сабе імя асізскага бедняка. “Падчас свайго пантыфікату
– канешне ў працягласці са сваімі папярэднікамі – ён нагадвае пра галоўнае: Евангелле.
Нагадвае пра тое, што самым важным з’яўляецца Езус Хрыстус, а разам з Ім, бедныя,
а з беднымі – усе хто належаць да свету экзістэнцыяльных і інтэлектуальных перыферый”,
- лічыць сакратар ватыканскай дыкастэрыі.