Святы Айцец: для святара – “быць” важнейшае за “рабіць”
“Неапрацаваным алмазам”
назваў Святы Айцец Францішак пакліканне да святарства. Менавіта таму яго трэба аберагаць
і развіваць, працаваць з ім з асцярожнасцю і павагай. Пантыфік сустрэўся 3 кастрычніка
2014 г. у Ватыкане з удзельнікамі пленарнага пасяджэння Кангрэгацыі па справах Духавенства.
Пакліканне – гэта не нейкае “завершанае заданне”, таму што святары ніколі не перастаюць
быць вучнямі Езуса, адзначыў Папа, яны ідуць за Ім. Часам гэта адбываецца дынамічна,
часам павольна, з падзеннямі, але заўсёды не зыходзячы з шляху. Менавіта таму чалавек,
пакліканы да святарства, павінен усё жыццё прысвяціць працы над цэласнасцю сваёй асобы:
інтэлектуальнай, чалавечай і духоўнай. Фармацыя, пачатковая і пастаянная, адрозніваюцца,
паколькі патрабуюць прымянення розных метадаў, але яны дзве палавіны адной рэальнасці,
жыцця вучня, які прабывае ў любові свайго Пана і пастаянна крочыць за Ім.
Францішак
нагадаў, што шлях развіцця паклікання мае канкрэтную мэту – евангелізацыю, ва ўсіх
яе формах. “Яна пачынаецца ў першую чаргу з “быць”, а затым пераходзіць да “рабіць”,
- дадаў ён. Гаворка ідзе пра святароў, вольных ад “мірской духоўнасці”, для якіх евангелізацыйнае
жыццё важнейшае за іх дасягненні, а малітва з’яўляецца сэрцам любой працы, адзначыў
Папа, звяртаючыся да ўдзельнікаў пленарнага пасяджэння Кангрэгацыі па справах Духавенства.