Пантыфік заклікаў еўрапейскіх біскупаў быць “прароцкім голасам” у грамадстве
“Важна, каб пастыры
і сем’і працавалі разам у духу пакоры і шчырага дыялогу”, - лічыць Святы Айцец. Ён
сустрэўся 3 кастрычніка 2014 г. з іерархамі, якія прымалі ўдзел у генеральнай асамблеі
Рады Біскупскіх Канферэнцый Еўропы, што праходзіла ў мінулыя дні ў Рыме на тэму: “Сям’я
і будучыня Еўропы”. Пантыфік заклікаў, каб парафіяльныя супольнасці былі “сем’ямі
сем’яў”. Менавіта такія асяроддзі могуць па сапраўднаму дапамагчы нарачоным сур’ёзна
рыхтавацца да сужэнства, а сужонкам браць пад апеку дзяцей, якія аказаліся без бацькоў.
У Еўропе не можа быць недахопу ў палітычнай і сацыяльнай падтрымцы сем’яў, асабліва
тых, якія перажываюць рознага роду праблемы, падкрэсліў Папа. Касцёл, у сваю чаргу,
павінен дзяліцца сваім досведам і быць прысутным у розных сферах жыцця сучасных людзей.
Супрацоўніцтва паміж пастырамі і сем’ямі павінна распаўсюджваецца і на галіну
адукацыі, перакананы Пантыфік. Менавіта сям’я “з’яўляецца школай чалавечнасці, братэркай
любові, адзінства”; менавіта яна рыхтуе сталых і адказных грамадзян. Адкрытае супрацоўніцтва
паміж Касцёлам і сям’ёй “спрыяе фарміраванню духа справядлівасці, салідарнасці, міру
і мужнасці”.
Францішак нагадаў пра адказнасць бацькоў па выхаванні сваіх дзяцей
і іх права рабіць гэта “у адпаведнасці са сваімі маральнымі і рэлігійнымі перакананнямі”.
Ён падкрэсліў, што ў першую чаргу бацькі, гэта “педагогі сваіх дзяцей”.
Касцёлы
ў Еўропе павінны развіваць узаемныя адносіны і садзейнічаць належнаму супрацоўніцтву
для плённай евангелізацыі, звярнуў увагу іерархаў Святы Айцец. Францішак запрасіў
іх быць “прароцкім голасам” у еўрапейскім грамадстве.