Մարոնի Եպիսկոպոսներու Խորհուրդը ընդգծեց նախազգուշական արշաւի մը կազմակերպութեան կարեւորութիւնը`
ի դէմ ահաբեկչական խմբաւորումներուն վտանգին։
Չորեքշաբթի, 1 հոկտեմբերին, Պքերքէի մէջ տեղի ունեցաւ Մարոնի եպիսկոպոսներու խորհուդի
նիստը նախագահութեամբ Պշարա Ռայի պատրիարքին։ Նիստի աւարտին հրապարկուած հաղորդագրութեամբ
մը Մարոնի Եպիսկոպոսները յայտրարած են, թէ պէտք է յստակ եւ անկեղծ կեցուածք որդեգրել,
ինչպէս նաեւ լիբանանեան ընկերութեան մէջ նախազգուշական արշաւ մը կազմակերպել` ահաբեկչական
խմբաւորումներուն ներկայացուցած վտանգին դէմ։ Մարոնի եպիսկոպոսներու խորհուրդը զօրակցութիւն
ցուցաբերեց` առեւանգուած բանակայիններուն ընտանիքներուն եւ անոնց ցաւերուն նկատմամբ հասկացողութիւն։
Եպիսկոպոսները ապա կոչ ուղղեցին բոլորին զօրակցելու զինուորական հաստատութիւններուն,
ինչպէս նաեւ ապահովութեան ուժերուն, որովհետեւ անոնք են, որոնք երկիրը կը փրկեն վտանգներէն: Անդրադառնալով
խորհրդարանին կողմէ գումարուող օրէնսդրական նիստին, Մարոնի եպիսկոպոսներու խորհուրդը
հաստատեց, որ օրինական միակ անհրաժեշտութիւնը հանրապետութեան նախագահի ընտրութիւնն է`
աւելցնելով, որ անկէ բացի կատարուած աշխատանքները սահմանադրութեան խախտում են: Մարոնի
եպիսկոպոսներու խորհուրդը խստիւ դատապարտեց մարդավաճառութիւնը, թմրեցուցիչի մաքսանենգումը,
ինչպէս նաեւ Լիբանան հասած գաղթական կիներու մարմնավաճառութեան մարզին մէջ շահագործելու
արարքները եւ կոչ ուղղեց լիբանանեան պետութեան բարոյական անձեռնմխելիութիւն պարտադրելու`
լիբանանեան ընկերութիւնը այդ վտանգներէն փրկելու համար: