Në Indi mbyllet katedra universitare me emrin e Nënë Terezës
Autoritetet akademike indiane lajmëruan mbylljen e katedrës për “Shëndetin, edukimin
dhe punën shoqërore”, kushtuar Nënë Terezës, së Lumes shqiptare të bamirësisë e të
dashurisë. Kjo katedër ishte pjesë e Universitetit të Hapur Kombëtar Indira Gandi,
në Nju Delhi, por tashmë, ka ndërprerë të gjitha leksionet e kurset për mungesë fondesh. Sipas
zv.kancelarit të universitetit, z. M. Aslam, “edhe disa anëtarë të personelit akademik
e kanë kritikuar këtë vendim”. Ndërkaq, ambientet katolike protestojnë. Në një notë,
aktivisti katolik John Dayal, sekretar i përgjithshëm i Këshillit të përbashkët të
krishterë indian, dënon ashpër këtë hap dhe e fton universitetin të gjejë sponsor
privatë për rihapjen e katedrës. “Mbyllja e katedrës kushtuar Nënë Terezës – shkruan
Dayal për agjencinë katolike Fides – mbërrin gjatë fushatës globale për shenjtërimin
e saj. Themeluesja e Misionareve të Dashurisë është ikonë e mëshirës dhe e dhembshurisë
njerëzore ndaj më të varfërve ndër të varfër, ndaj fëmijëve e të sëmurëve të pashërueshëm.
Sari i bardhë me shiritat blu është simbol universal i këtyre vlerave, për të cilat
India ka shumë nevojë”. Katedra u themelua në shkurt të vitit 2000, falë një memorandumi
bashkëpunimi ndërmjet Konferencës Ipeshkvnore të Indisë dhe Universitetit të Delhit.
Gjatë këtyre viteve ka nisur një sërë programesh studimi në fushën e sociologjisë,
duke synuar të kontribuojë në zgjidhjen e disa problemeve shoqërore në Indi. Ndër
argumentet e shumta të kurseve, që zhvillonte kjo katedër, bënin pjesë edhe fenomene
si Sida, edukimi për jetën familjare, apo problemet e drogës në shoqërinë indiane.