Папа моліцца за моладзь Беларусі і ўвесь беларускі народ
Папа Францішак пазнаёміўся
з сітуацый Касцёла ў Беларусі, атрымаў некаторыя падарункі ад беларускіх вернікаў
і выказаў надзею, што маладыя беларусы, незалежна ад веравызнання і перакананняў,
будуць адчуваць сябе пратаганістамі будучыні – людзьмі неабыякавымі да супольнага
дабра сваёй краіны і ўсяго чалавецтва. Аб гэтым ён сказаў падчас аўдыенцыі для Апостальскага
нунцыя ў Беларусі, арцыбіскупа Клаўдыё Гуджэроцці 25 верасня 2014 г. Святы Айцец прадэманстраваў
глыбокае веданне ролі Беларусі ў працэсе аднаўлення міру ва Украіне і нагадаў, што
асаблівая місія хрысціян – быць міратворцамі, таму што любоў мацнейшая за любыя этнічныя
падзелы і палітычныя рознагалоссі, паведамляе сайт Каталіцкага Касцёла ў Беларусі
www.catholic.by. Пантыфік падкрэсліў, што Святы Пасад і надалей будзе намагацца дзейнічаць
на карысць беларускага народа, і выказаў надзею на тое, што атмасфера дыялогу і ўзаемапаразумення
паміж Святым Пасадам і Рэспублікай Беларусь будзе ўмацоўвацца, дазваляючы знайсці
пазітыўнае рашэнне некаторых адкладзеных пытанняў.
Апостальскі нунцый, у сваю
чаргу, перадаў папу Францішку некалькі пілігрымскіх футболак – падарунак беларускай
каталіцкай моладзі, якая сёлета пілігрымавала ў санктуарый Маці Божай Будслаўскай.
З жывой зацікаўленасцю Пантыфік пазнаёміўся са здымкамі і пасланнем, якое яму скіравалі
маладыя пілігрымы. Папа таксама запэўніў, што моліцца за моладзь Беларусі і ўвесь
беларускі народ.