Кардынал Дзяржсакратар: тэрарызм уяўляе пагрозу для ўсяго чалавецтва
24 верасня 2014 г.
кардынал Дзяржсакратар Пьетра Паралін прыняў удзел у дэбатах Савета Бяспекі ААН на
тэму “Пагрозы міжнароднаму міру і бяспецы, якія ствараюць тэрарыстычныя акты”. У сваім
выступленні ён адзначыў, што ўсе дзяржавы і людзі добрай волі павінны згуртавацца
ў адказ на выклік, кінуты тэрарызмам. Ватыканскі дыпламат узгадаў, што Савет Бяспекі
ААН быў заснаваны ў эпоху, калі нігілістычны погляд на чалавечую годнасць ужо спрабаваў
зруйнаваць і раскалоць наш свет. Сёння, як і ў той час, дзяржавы павінны аб’яднацца,
каб абараніць людзей ад бесчалавечай жорсткасці і насілля.
Цытуючы папу Яна
Паўла II, ён прыгадаў, што права на антытэрарыстычную абарону краін і народаў не дае
дазволу на ўжыванне насілля супраць насілля, але яно “павінна ажыццяўляцца з павагай
да маральных і прававых межаў у выбары мэтаў і сродкаў”. Неабходна правільна ідэнтыфікаваць
злачынцаў, бо віна тэрарыстаў заўсёды асабістая і яе нельга пашыраць на ўсю нацыю,
этнічную группу ці рэлігію, да якой яны належаць.
Джяржсакратар звярнуў увагу
на сацыяльныя прычыны міжнароднага тэрарызму. Моладзь, якая ўступае ў шэрагі тэрарыстаў,
часцяком паходзіць з незабяспечаных сем’яў мігрантаў, расчараваных грамадствам, у
якім адсутнічаюць каштоўнасці і магчымасці інтэграцыі. Урады краін павінны не толькі
ўсімі легальнымі сродкамі прадухіляць вярбоўку сваіх грамадзян, але і садзейнічаць
іх адэкватнай сацыяльнай інтэграцыі.
Напрыканцы выступлення кардынал Паралін
падкрэсліў вялікую адказнасць вернікаў у асуджэнні тых, хто выкарыстоўвае веру для
апраўдання насілля. Як падкрэсліў папа Францішак падчас свайго Апостальскага падарожжа
ў Албанію, “няхай ніхто не выкарыстоўвае рэлігію як падставу для дзеянняў супраць
чалавечай годнасці і асноўных правоў кожнага мужчыны і кожнай жанчыны, перш за ўсё,
супраць права на жыццё і рэлігійную свабоду!”.