Абраны афіцыйны гімн Сусветных дзён моладзі 2016 г. у Кракаве
Песня “Благаслаўлёныя
міласэрныя” аўтарства Якуба Блыхажа стала афіцыйным гімнам Сусветных дзён моладзі
2016 г. у Кракаве. Твор зацвердзілі ў гэтай якасці арганізацыйны камітэт форума і
Папская рада па справах свецкіх. Як паведамляецца на старонцы Сусветных дзён, абраны
гімн з’яўляецца адным з 94, прадстаўленых на конкурс. Яго афіцыйная прэзентацыя адбудзецца
ў Кракаве 28 кастрычніка 2014 г. Якуб Блыхаж – па прафесіі юрыст, з’яўляецца аўтарам
некалькіх літургічных спеваў.
Раней быў прэзентаваны афіцыйны лагатып кракаўскага
форуму. Ён уяўляе сабой крыж, які сімвалізуе Езуса Хрыста. У сярэдзіне жоўты круг
– сімвал Кракава і моладзі. Вакол крыжа бачная іскра Божай міласэрнасці, што з’яўляецца
спасылкай на абраз сястры Фаўстыны – “Езу, давяраю табе”. Лагатып звязаны з біблійным
тэкстам, які быў выбраны ў якасці тэмы сустрэчы моладзі: “Шчаслівыя міласэрныя, бо
яны спазнаюць міласэрнасць” (Мц 5, 7). У ліпені 2014 г. была прадстаўлена таксама
афіцыйная малітва форуму.
XXXI-я Сусветныя дні моладзі пройдуць у Кракаве 26-31
ліпеня 2016 г.