На важнасць апостальскай
дзейнасці Касцёла ў сферы аховы здароўя ў Заходняй Афрыцы звярнуў увагу папа Францішак
падчас сустрэчы з епіскапатам Ганы, які знаходзіцца ў Рыме з візітам “ad limina Apostolorum”.
Гэта набывае асаблівае значэнне ў абліччы распаўсюджання віруса Эбола, дадаў Пантыфік.
Ён запэўніў, што моліцца за ўсіх памерлых у выніку эпідэміі і нагадаў, што сярод іх
шмат святароў, законнікаў і медыцынскіх работнікаў, якія былі інфіцыраваны падчас
апекі над пацыентамі. “Няхай Бог умацуе ўвесь медыцынскі персанал і пакладзе канец
гэтай трагедыі!”, - сказаў Папа, звяртаючыся да біскупаў Ганы.
Францішак даў
іерархам шэраг рэкамендацый, звязаных з працай па евангелізацыі ў афрыканскай краіне,
у якой, як адзначыў, прысутнічаюць розныя рэлігійныя традыцыі, што патрабуе супрацоўніцтва
ўсіх на карысць народу.