Папа да кіраўніцтва Албаніі: трэба, каб глабалізацыі рынкаў адпавядала глабалізацыя
салідарнасці
Павага да правоў чалавека,
уключаючы свабоду рэлігіі і свабоду слова, з’яўляецца неабходнай умовай для сацыяльнага
і эканамічнага развіцця краіны, падкрэсліў Святы Айцец, гаворачы пра пераход да дэмакратыі,
падчас сустрэчы 21 верасня 2014 г. у Тыране з прадстаўнікамі албанскіх уладаў. Францішак
нагадаў, што Албанія з’яўляецца домам гераічных людзей, якія аддалі свае жыцці за
незалежнасць, і мучанікаў, якія сведчылі аб сваёй веры ў гады пераследу. У гэтым кантэксце
Святы Айцец заклікаў развіваць асаблівую атмасферу павагі і ўзаемнага даверу паміж
католікамі, праваслаўнымі і мусульманамі, якія пражываюць у Албаніі. “Яна набывае
асаблівае значэнне ў наш час, калі часткай экстрэмісцкіх груп скажаецца сапраўдны
сэнс рэлігіі і парушаюцца і інструменталізуюцца адрозненні паміж рэлігіямі, што робіць
іх небяспечным фактарам канфлікту і насілля”, - сказаў Пантыфік да сабраных у Прэзідэнцкім
палацы.
“Няхай ніхто не думае, што ён можа прыкрывацца Богам, калі плануе
і здзяйсняе акты насілля і пераслед! Няхай ніхто не выкарыстоўвае рэлігію ў якасці
падставы для сваіх дзеянняў, якія супярэчаць прынцыпам годнасці чалавека і яго асноўных
правоў, у першую чаргу права ўсіх да жыцця і свабоды веравызнання”, - падкрэсліў Францішак.
Ён адзначыў, што албанскі вопыт паказвае, што мірнае і плённае суіснаванне паміж людзьмі
і рэлігійнымі супольнасцямі не толькі пажадана, але і магчыма, і выканальна.
Папа
адзначыў паспяховае развіццё місіі Касцёла ў апошнія гады. Яго прысутнасць і дзейнасць
служаць усяму албанскаму народу. У той жа час, Святы Айцец адзначыў, што сёння ўзнікаюць
новыя выклікі. І варта, каб глабалізацыі рынкаў адпавядала глабалізацыя салідарнасці,
эканамічны рост суправаджаўся большай павагай да стварэння. Папа заклікаў да ўмацавання
сям’і і запэўніў, што, як і 21 год таму св. Ян Павел II, ён даручае Марыі, Маці Добрай
Рады, Албанію і яе жыхароў.