Իպոլայի համաճարակը արդէն խլած է աւելի քան 2400 մարդոց կեանքը
«Ռոյթըրզ» կը հաղորդէ, որ Լիպերիոյ նախագահ Էլըն Ճոնսըն Սրլիֆ Միացեալ Նահանգներու նախագահ
Պարաք Օպամայէն խնդրած է աջակցութիւն եւ օգնութիւն տրամադրել Լիպերիոյ` Իպոլա ժահրի համաճարակին
դէմ պայքարելու համար` ըսելով, որ առանց այդ օգնութեան իր երկիրը պիտի չկարենայ համաճարակին
դէմ պայքարէն յաղթական դուրս գալ: Իպոլա համաճարակը առաջին անգամ յայտնաբերուեցաւ
այս տարուան մարտին եւ արդէն խլած է 2400 մարդու կեանք` մեծամասնութեամբ Լիպերիոյ մէջ,
ինչպէս նաեւ Կինէի եւ Սիերա Լէոնէի մէջ: Արեւմտեան Ափրիկէ առողջապահական ծանր ճգնաժամ
կը դիմագրաւէ` յանկարծակի այսպիսի թափ առած համաճարակին պատճառով: Հակառակ անոր որ
Լիպերիոյ կառավարութիւնը կարելի եղածին չափ կ՛աջակցի հիմնումին տարբեր կեդրոններու, ուր
մեկուսարան-անկողիններ կը տրամադրուին հիւանդներուն, սակայն տակաւին հազար մեկուսարան-անկողինի
կարիք կայ: Միացեալ Նահանգներ արդէն տրամադրած են հարիւր միլիոն տոլար` հիւանդութեան
առաջքը առնելու համար: