Святы Айцец просіць падтрымаць малітвай яго візіт у Албанію
Папа Францішак папрасіў
вернікаў аб малітоўнай падтрымцы свайго Апостальскага падарожжа ў Албанію, якое адбудзецца
ў бліжэйшую нядзелю. Звяртаючыся да ўдзельнікаў агульнай аўдыенцыі на плошчы св. Пятра,
Пантыфік адзначыў, што “вырашыў наведаць гэту краіну, таму што яна шмат пакутавала
ад жудаснага атэістычнага рэжыму”, а сёння ў ёй “рэалізуецца мірнае суіснаванне паміж
рознымі рэлігійнымі кампанентамі”. “Ужо зараз з любоўю вітаю албанскі народ і дзякую
за падрыхтоўку гэтага візіту. Прашу ўсіх падтрымліваць мяне малітвай праз заступніцтва
Маці Божай Добрай Рады”, - сказаў Святы Айцец.
Пантыфік наведае Албанію 21
верасня 2014 г. Падчас візіту ён сустрэнецца з палітычнымі і рэлігійнымі ўладамі краіны,
узначаліць Эўхарыстыю на плошчы Маці Тэрэзы з Калькуты, у цэнтры Тыраны, а таксама
звернецца да мясцовага духавенства, рэлігійных лідэраў краіны, сацыяльных работнікаў
і дабрачынцаў, моладзі і дзяцей.