Ուրբաթ 12 սեպտեմբերի առաւօտեան, Ֆրանչիսկոս Պապը, ընդունելով Քոնկոյի եպիսկոպոսական
համահաւաք դասը, անոնց ուղղած հայրական ճառին մէջ ըսաւ. ''սիրեցեալ եղբայրներ ի Քրիստոսւ,
ձեր այս ուխտագնացութիւնը ս. Պետրոս եւ Պօղոս առաքելապետերու գերեզմաններուն, առիթ մըն
է սերտացնելու ձեր կապը Առաքելական Աթոռին, ու աշխարհի եպիսկոպոսներուն հետ''։ Ձեր
վերադարձին հաղորդեցէք իմ ողջոյնս կղերին ու հաւատացեալներուն։ Գոհութիւն մատուցանենք
Տիրոջ որ այնքա՜ն բարիքներ կը շռայլէ ձեր երկրին` Եկեղեցւոյ միջոցաւ։ Աւետարանի հաւատարմութիւնը
կ'ենթադրէ որ Եպիսկոպոսը իմաստութեամբ առաջնորդէ եւ կառավարէ իրեն յանձնուած հօտը։ Բարի
հովիւը կը ճանչնայ իր ոչխարները եւ ոչխարները կը ճանչնան զայն։ Ձեր եկեղեցին երիտասարդ
է ու երիտասարդներու համար եղած է։ Անոնք կարիքը ունին Աստուծոյ զօրութեան որպէսզի հաստատ
մնան հաւատքին մէջ։ Հետեւաբար հարկաւոր է զարգացնել անչափահասներու հովուութիւնը, անոնց
ընծայելով պատշաճ հարմարութիւնները։ Աւետարանի հաւատարմութիւնը կ'ենթադրէ նաեւ սատարել
երկրի բարգաւաճումին ու քաջալերել հասարակաց բարիքը։ Սիրեցեալ եղբայրներ ի Քրիստոս,
կը հրաւիրեմ ձեզ անխոնջ աշխատելու ընկերութեան մնայուն խաղաղութեան ու արդարութեան վերահաստատումին
համար, համագործակցելով կրօնական այլ յարանուանութիւններուն հետ – ըսաւ Սրբազան Հայրը
ու ճառը եզրափակեց իր առաքելական օրհնութիւնը տալով եպիսկոպոսներուն, կղերին ու հաւատացեալներուն,
հայցելով Տիրոջ օրհնութիւնը բոլորին վրայ եւ Քոնկոյի եկեղեցին յանձնելով Ամենասուրբ Կոյս
Մարիամի մայրական հովանաւորութեան։