Արաբ արտաքին գործոց նախարարները համաձայնութիւն գոյացուցած են ՏԱՀԵՇ-ի եւ ահաբեկչական
այլ խմբաւորումներու դէմ միջոցառումներ որդեգրելու:
Կիրակի, 7 սեպտեմբեր 2014-ին, Գահիրէի Արաբական լիկայի Գահիրէի կեդրոնատեղիին մէջ տեղի
ունեցաւ արաբ արտաքին գործոց նախարարներու ժողովը, որուն ընթացքին քննարկուեցան Պաղեստինի,
Իրաքի եւ Սուրիոյ վերաբերող հարցերը: Արաբ արտաքին գործոց նախարարներու ներկայ նստաշրջանի
նախագահութիւնը ստանձնեց Մաւրիտանիան: Նախքան պաշտօնական նիստը տեղի ունեցած խորհրդակցական
ժողովի ընթացքին Լիբանանի արտաքին գործոց նախարար Ժըպրան Պասիլ առաջարկեց, որ լիկային
հրապարակելիք որոշումին խորագիրը ըլլայ արաբական աշխարհի կողմէ ՏԱՀԵՇ-ի դէմ պատերազմի
յայտարարութիւնը: Նիստի ընթացքին Արաբական լիկայի ընդհանուր քարտուղար Նեպիլ Արապի,
անդրադառնալով Սուրիոյ, Իրաքի, Պաղեստինի եւ այլ արաբական երկիրներու մէջ տեղի ունեցող
իրադարձութեանց, յայտնեց, որ արաբական աշխարհի դիմագրաւած մեծագոյն մարտահրաւէրը ՏԱՀԵՇ-ն
ու «բոլոր ահաբեկչական, կրօնական եւ ծայրայեղական խմբաւորումներ են»` պահանջելով, որ
արաբական յստակ եւ վճռական որոշում մը որդեգրուի ահաբեկչութեան դէմ զինուորական եւ քաղաքական
արշաւի մը ձեռնարկելու` զինուորական, գաղափարախօսական, ապահովական, մշակութային եւ տնտեսական
համապարփակ դիմակայման ճամբով: «Ռոյթըրզ» հաղորդեց, որ արաբ արտաքին գործոց նախարարները
համաձայնութիւն գոյացուցած են ՏԱՀԵՇ-ի եւ ահաբեկչական այլ խմբաւորումներու դէմ միջոցառումներ
որդեգրելու: