Papa ipeshkvijve të Kamerunit: dialog me myslimanët; jo, dhunës antikristiane
Dialogu ndërfetar, familja, ungjillëzimi. Janë këto, tri temat e mprehta, prekur nga
Papa Françesku në fjalimin, dorëzuar ipeshkvijve të Kamerunit, të cilët i priti dje,
në përfundim të vizitës së tyre “ad Limina”. Papa u tërhoqi vëmendjen meshtarëve t’u
rrinë larg tundimeve të pushtetit e të parasë, që s’janë tjetër, veç “kundërdëshmi”,
në një zonë ku shumëkujt i mungon edhe buka e gojës.
Dëshmi e dialog. Këtë
kërkon Papa nga ipeshvijtë e Kamerunit. Në disa nga dioqezat tuaja, pohon në fjalim,
prania e shumtë e myslimanëve tingëllon si ftesë për ta dëshmuar me guxim e gëzim
besimin në Krishtin e Ngjallur. E dialogu duhet zhvilluar me frymë besimi reciprok,
për të ruajtur, kështu, bashkëjetesën paqësore e për t’i vënë pritë çdo shprehjeje
të dhunës, nga e cila vuajnë jo pak të krishterë në vise të ndryshme të Kontinentit
afrikan. Papa e nxit klerin vendas të jetë i bashkuar e të gjejë rrugëzgjidhje të
përbashkëta për sfidat, që duhen përballuar, duke kapërcyer paragjykimet, posaçërisht
ato etnike. Françesku kërkon nga ipeshkvijtë të punojnë për formimin e vazhdueshëm
të jetës shpirtërore të priftërinjve, sepse tundimet e botës janë të shumta, duke
nisur nga tundimi i dëshirës për sa më shumë pushtet, për të përfunduar tek ai për
sa më shumë para. E këto Papa i quan “kundërdëshmi”, që mund të kenë një mori shprehjesh,
nga administrimi i padenjë i pasurive të Kishës, tek përvetësimi e shpërdorimi, që
mund të marrin pamjen e mirëfilltë të shkandullit, në një kohë kur shekullarizimi
e relativizmi po lëshojnë rrënjë edhe në Afrikë. Françesku kërkon të vihen në qendër
të vëmendjes familjet që, për shkak të varfërisë, mund të rikthehen tek praktikat
e fesë së tyre tradicionale, që nuk përkojnë me fenë e krishterë. Papa nxit edhe
për bashkëpunim ndërmjet Kishës e Shtetit në Kamerun, me theks tek roli i jashtëzakonshëm
i insitutcioneve kishtare në vend, që e lidhin ngushtë ungjillëzimin me përparimin
njerëzor. Françesku e përfundon fjalimin duke ia besuar Kamerunin Zojës së Bekuar
e Shën Gjon Palit II, që e vizitoi dy herë vendin afrikan.