Арцыбіскуп Тамазі: выкарыстанне сілы для спынення генацыду – законна
“Мы ўсе члены адной
сям’і, і калі парушаюцца фундаментальныя правы адной з яе частак, а мясцовыя структуры
не ў стане іх абараніць, перад міжнароднай супольнасцю ўзнікае абавязак зрабіць усё
магчымае для гэтага”, адзначыў арцыбіскуп Сільвана Тамазі, пастаянны назіральнік Апостальскай
Сталіцы пры ААН, каментуючы сітуацыю на Блізкім Усходзе ў інтэрв’ю італьянскаму выданню
“Corriere della sera”. Ватыканскі дыпламат перакананы: “Тэрмінова неабходна ўмяшацца,
пакуль не стала вельмі позна”. Арцыбіскуп Тамазі адзначыў, што ў існуючай сітуацыі
Касцёл дзейнічае праз “голас Папы”, яго звароты да міжнароднай супольнасці. Гаворачы
пра словы Пантыфіка аб законнасці “спынення несправядлівага агрэсара” іерарх растлумачыў:
“Калі выкарыстоўваецца сіла, каб спыніць ці прадухіліць генацыд або пагрозу катастрофы
– гэта не азначае, што абвяшчаецца вайна: проста бароніцца фундаментальнае права на
жыццё, якое мае кожны чалавек. Так званая “Ісламская дзяржава” выступіла супраць усёй
чалавечай сям’і, а не супраць той ці іншай групы. Гаворка ідзе не пра рэлігійныя правы,
але пра фундальныя правы чалавека”, - сказаў дыпламат.
Паводле прадстаўніка
Святога Пасаду, на Блізкім Усходзе няма вайны паміж ісламам і хрысціянствам. “Мяснякі
і іншыя баевікі так званага Халіфата, выкарыстоўваюць рэлігійную рыторыку, каб заваяваць
уладу”, а ад канфлікту церпяць як вызнаўцы Хрыста, так і прадстаўнікі іншых рэлігій,
адзначыў ён.