Imzot Tomasi: të ndalohet Is, mund të kemi pasoja shkatrrimtare
Në Irak, sipas njoftimeve, që vijnë nga vendi, xhihadistët e Shtetit Islamik duhet
të jenë tërhequr nga një sërë fshatrash në jug të Kirkukut.Ndërkaq Amnesty International
denoncon ekstremistët, që kanë nisur fushatën e spastrimit etnik në veri të vendit,
duke u ngarkuar me krime të rënda lufte kundër pakicave etnike dhe fetare. Përballë
një situate të tillë, Këshilli i OKB-së për të drejtat e njeriut vendosi dje të dërgojë
një mision në Irak. Të dëgjojmë vëzhguesin e përhershëm të Selisë së Shenjtë pranë
zyrës së Kombeve të Bashkuara të Gjenevës, imzot Silvano Maria Tomasi-n, në
mikrofonin tonë:
Përgjigje: - Bashkësia ndërkombëtare e shikon si detyrë
mbrojtjen e të drejtave themelore të këtyre njerëzve, përmes mjeteve, që i janë besuar
si Kombe të Bashkuara, domethënë, përmes Këshillit të Sigurimit, Këshillit për të
drejtat e njeriut e kështu me radhë. Ndërkaq këtu, në Gjenevë, përfundoi sesioni i
posaçëm i Këshillit për të drejtat e njeriut, kushtuar Irakut. U miratua njëzëri rezoluta,
që kërkon të dërgohet një mision hetimor në Irak, për të dokumentuar dhunën e ushtruar,
në mënyrë që, më pas, t’i nxjerrë fajtorët para gjyqit e të mos lejojë t’i shpëtojnë
dënimit. Do të ishte nxitje që, grupe të tjera, të kryenin të njëjtat krime.
Pyetje:
- Pra, sipas jush, po thellohet vetëdija për rrezikshmërinë e Shtetit islamik?
Përgjigje:
- Fakti që vërehet ky reagim i koordinuar, ky dënim universal, me sa duket, tregon
se rreziku nuk kufizohet vetëm në veri të Irakut dhe në bashkësitë, që janë goditur
drejtpërdrejt. Por edhe se t’i lësh të vijojnë përparimin në vise të tjera, duke fituar
terren, është krejt e palejueshme. Një gjë e tillë duhet parë si rrezik i madh, që
mund të ketë pasoja tejet të rënda. U duhet prerë, prandaj, rruga një herë e përgjithmonë,
këtyre mercenarëve të ardhur nga Evropa e vise të tjera, për të lënë pas vdekje e
shkatërrim tronditës.
Pyetje: - Si janë pritur thirrjet e vazhdueshme
të Papës për paqe?
Përgjigje: - Besoj se forca me të cilën Papa ka bërë
thirrje të vazhdueshme, duke i ftuar të gjithë të luten e ta njohin sa më thellë situatën,
ka ndikuar mbi opinionin publik të shteteve. I ka nxitur të lëvizin, të bëjnë diçka
konkrete. E, duke kaluar nga fjalët, në vepra, ta çarmatosin sa më shpejt dorën e
agresorit të padrejtë.