Ju kumtojmë Lajmin e Mirë - Herodi përballë Jezusit
Në rubrikën “Ju kumtojmë Lajmin e Mirë”, jemi në kapitullin e gjashtë të Ungjillit
sipas Markut, ku tregohet se emri i Jezusit ishte bërë aq i njohur, sa për të kishte
dëgjuar edhe mbreti Herod. Me shumë pak fjalë,
Marku tregon trazimin e Herodit kundrejt Jezusit, për të cilin mendon: “Gjon Pagëzuesi
është ringjallur nga të vdekurit, prandaj vepron me fuqinë e mrekullive” (v.14). Trazimi
i Herodit, sikurse trazimi i kryepriftërinjve dhe i krerëve të popullit përballë Jezusit
e përshkon tërë ekzistencën tokësore të Birit të Hyjit, që nga lindja, në Betlehem,
deri në vdekje, në Golgotë. Paraqitja e Jezusit në jetën e njerëzve ngjall dy reagime:
besimin në Krishtin dhe ndjekjen e tij me gëzim e vendosmëri, ose trazimin që mbetet
në shpirt nga mospranimi i dashurisë, që ai sjell nga qielli. Kush beson në Jezusin
nuk rravgon me mendime, duke kërkuar me cilin personazh të historisë ta krahasojë
apo përnjëjtësojë, por i rrëfen me çiltërsinë e fesë: “Ti je Krishti, Biri i Hyjit
të gjallë!”, siç bëri Pjetri. Feja nuk e çliron njeriun menjëherë nga mendësia tokësore,
sepse mbetet në përfytyrimin tonë shëmbëllimi i lavdisë së gabuar. Pjetri, për shembull,
e qorton Jezusin kur ai paralajmëron mundimet dhe vdekjen. Megjithatë, feja nuk lejon
që njeriu të mbetet i ngatërruar në leqet e gabimeve të veta, sepse krijon vetëdijen
se Jezusi ka ardhur për të na zgjidhur nga fajet, prandaj frymëzon besimin e plotë
kundrejt tij. Herodi mbetet i ngatërruar në fajin e vet. Ai kishte dhënë urdhër
t’i pritej koka Gjon Pagëzuesit, sepse këtë ia kishte kërkuar Herodiada, gruaja e
të vëllait, me të cilën jetonte. Dhe, meqë jetonte në gabim, i del përpara figura
e atij, që i kujtonte gabimin. Por, cili është dallimi ndërmjet Jezusit dhe Gjonit?
Gjoni, si të gjithë profetët, edhe pse “më i madhi ndër të lindurit nga gruaja” (Lk
7,28), mundet vetëm të ketë shikimin e qartë për të dalluar gabimin nga e vërteta,
por jo fuqinë për t’i falur mëkatet, ndërsa Jezusi, Qengji i Hyjit, e shlyen mëkatin
e botës, e sheshon udhën e takimit të mëkatarit me të. Herodi mbetet peng i mëkatit
të vet, prandaj nuk shikon përtej Gjon Pagëzuesit dhe, duke dëgjuar për Jezusin, thotë
me vete: “Gjoni, për të cilin urdhërova t’i pritej koka, është ringjallur” (v.16).
“Ndërsa të tjerë thoshin: ‘Është Elia’ e të tjerë ende: ‘Është një ndër profetët’”
(V.15). Jezusi mund të hyjë si Zot në jetën tonë vetëm kur ne të pranojmë faljen e
mëkateve, që ai na e sjell në emër të Hyjit.