Imzot Warduni: bota të ruhet nga xhihadistët, nëse nuk do t’i gjejë në shtëpi të vet
Sekretari i Shtetit amerikan, John Kerry, bëri thirrje për një koalicion global, që
t’i japë fund “programit të genocidit” të xhihadistëve të të vetëquajturit Shtet Islamik
(Is). Ipeshkvi ndihmës i Patriakatit kaldeas të Bagdadit, Shlemon Warduni,
duke folur në Mitingun e Riminit, theksoi se bashkësia ndërkombëtare është paralizuar
përballë sulmit të ekstremistëve në Irak. E intervistuam: Përgjigje:
- Ky është mendimi ynë, sepse që në krye evropianët nuk lëvizën. U kujtuan për
ne, pas një muaji e gjysëm, kur ngritëm zërin, madje bërtitëm në kupë të qiellit:
“Ku është bashkësia ndërkombëtare? Ku është Evropa? Ku, Amerika?”. Deri tani janë
mjaftuar ta dënojnë Is-in. Po ç’rezultate ka dhënë ky dënim? Kush ua vuri veshin?
Ne duam që Evropa, Amerika e të gjithë t’i marrin punët shumë më seriozisht. Është
një situatë që vë në rrezik mbarë botën. Duhet ta dinë mirë këtë, evropianët, Amerika,
OKB-ja, se këto bashkësi kaq të forta islamike duan të bëjnë vetëm keq, duan vetëm
të vrasin, duan t’i shkatërrojnë të gjithë, veç vetes. Po kush janë këta? Nga na erdhën?
Pse duan të na shkulin me rrënjë ne, që jemi irakianë prej kohësh që s’mbahen mend,
prej më se 2000 vjetësh, që jemi të krishterë 400 vjet para se të arrinin këta njerëz.
Prej nga vijnë? Çfarë u kemi bërë? Kush i ndihmon? Ai që i ndihmon, është edhe më
i zi, se ata vetë.
Pyetje: - Si mund të dilet, sipas jush, nga kjo
gjendje? Përgjigje: - Para së gjithash, mbarë bota duhet t’i ketë mirë parasysh
këto gjëra. sepse këta duan ta shkelin nën thembër mbarë njerëzimin. Duhet ta dijë
kush i nxit edhe i mbështet: me armë, me para, me gjithçka u nevojitet. Prej këndej,
nëse e gjithë bashkësia ndërkombëtare nuk do të tregojë vëmendjen e duhur, mendoj
se një ditë jo të largët do t’i gjejë te porta e do t’i thonë: “Përjashta!”.