Папа Францішак прывітаў
групу кубінскіх біскупаў, якія прыбылі ў Рым з нагоды ўстанаўлення ў Ватыканскіх садах
статуэткі Маці Божай Міласэрнасці з Эль-Кобрэ – апякункі Кубы і адной з самых шанаваных
і любімых кубінцамі фігурак Найсвяцейша Панны Марыі. Звяртаючыся да іерархаў прысутных
на агульнай аўдыенцыі 27 жніўня 2014 г., Святы Айцец папрасіў іх запэўніць у блізкасці
і благаслаўленні, усіх вернікаў Кубы. Устанаўленне копіі статуэткі Маці Божай Міласэрнасці
з Эль-Кобрэ адбудзецца вечарам 28 жніўня. Цырымонію ўзначаліць былы Дзяржсактар Яго
Святасці Папы кардынал Тарчызіа Бэртонэ.
Арыгінальная фігурка захоўваецца
ў марыйным санктуарыі ў Сант’яга-дэ-Куба. Традыцыя апавядае, што яна была знойдзена
трыма падлеткамі ў водах Нэйпскай бухты каля 1612 г. Маладыя здабытчыкі солі апынуліся
ў моры падчас буры і моцна прасілі Панну Марыю аб ратаванні. Калі бура закончылася,
яны ўбачылі на хвалях сухую фігурку Маці Божай прывязаную да дошкі, на якой было напісана:
“Я Маці Міласэрнасці”.
У Ватыканскіх садах знаходзіцца некалькі скульптур,
санктуарыяў і гротаў прысвечаных Панне Марыі. Сярод іх бронзавая копія абраза Маці
Божай Чэнстахоўскай, якая з’яўляецца апякункай ватыканскага геліапорта і абраза Маці
Божай Добрай Рады з Джэнаццана, грота Маці Божай Лурдскай і Маці Божай Апекі, якая
была пабудавана ў 1917 г. па ініцыятыве Бэнэдыкта XV. У 2013 г. тут была ўстаноўлена
копія скульптуры Маці Божай з Суяпы, апякункі Гандураса.