Սուրիա պատրաստակամութիւն յայտնած է ահաբեկչութեան դէմ պայքարի ծիրէն ներս համագործակցելու
միջազգային պետութեանց հետ։
Սուրիոյ արտաքին գործոց նախարար Ուալիտ Մոալլեմ երէկ տրուած մամլոյ ասուլիսի մը ընթացքին
յայտարարեց, որ իր երկիրը պատրաստ է ՄԱԿ-ի Ապահովութեան խորհուրդի վերջին որոշումին ծիրին
մէջ ահաբեկչութեան դէմ պայքարին մէջ շրջանային եւ միջազգային պետութեանց, ներառեալ` Միացեալ
Նահանգներու եւ Բրիտանիոյ հետ գործակցելու եւ համակարգում կատարելու` շեշտելով, որ Սուրիան
պէտք է ահաբեկչութեան դէմ պայքարի միջազգային դաշնակցութեան մէջ ըլլայ` «եթէ այդ ուղղութեամբ
լուրջ են»: «Դամասկոս մինչեւ հիմա ահաբեկչութեան դէմ պայքարին առնչութեամբ Արեւմուտքին
կողմէ լրջութիւն չնշմարեց: Յառաջիկայ օրերը պիտի վճռեն, թէ շրջանային ու միջազգային պետութիւնները
որքանո՛վ լուրջ են ահաբեկչութեան դէմ պայքարին նկատմամբ», ըսաւ ան: Սուրիական դիւանագիտութեան
պետը ընդգծեց. «Սուրիական հողամասերուն վրայ առանց սուրիական կառավարութեան հետ գործակցութեան
ահաբեկչութեան դէմ պայքարի վերնագիրին տակ կատարուած որեւէ գործողութիւն յարձակում է»: