Françesku është në Seul: “Zoti e bekoftë Korenë!”.
Papa Françesku arriti në Seul, duke nisur kështu, shtegtimin e tij të tretë ndërkombëtar.
Avioni papnor preku aeroportin e kryeqytetit jugkorean, kur në Evropë ora ishte rreth
3.15 e mëngjesit. Për ta pritur Papën, kishte dalë presidentja Park Geun-hye. Në një
tweet të Papës, në sa po arrinte, shkruhet: “Zoti e bekoftë Korenë e, në mënyrë të
veçantë, të rinjtë e të moshuarit e saj!”. Për orët e para të Françeskut në tokën
koreane, të ndjekim shërbimin e të dërguarit të Radio Vatikanit, Davide Dionisi:
Papa Françesku
është në Kore. Në orën dhjetë e gjashtëmbëdhjetë, me orën vendase, avioni papnor preku
tokën në bazën ajrore të Seulit. Për ta pritur kishte dalë presidentja e Republikës,
zonja Park Geun-hye. Ceremonia shumë e përzemërt, konfirmoi klimën e entuziazmit,
që ka pushtuar këto ditë mbarë vendin, në pritje të Papës posaçërisht të dashur nga
koreanët. Të gjitha organet kryesore të shtypit i kushtojnë faqet e para kësaj vizite
dhe i ftojnë lexuesit e tyre t’i ndjekin me gjithë shpirt këto orë lumturie me Papën
Françseku. “Ati i Shenjtë i të Varfërve arrin në një tokë të ndarë e drita e pajtimit
shndrit mbi gjithë Korenë”: ky, mesazhi që përhapet nga të katër anët e gadishullit,
këto ditë të pritura prej 25 vjetësh. Kisha vendase, që prej një viti protagoniste
e përgatitjes së ngjarjes së madhe, është posaçërisht në festë. Së pari, për krijimin
e kardinalit Yeom Soo-Jung, kryeipeshkëv i Seulit, e pastaj, për njoftimin e lumnimit
të 124 martirëve e për vizitën papnore me rastin e Ditës së Rinisë Aziatike. Ceremonia
e mirëseardhjes parashikohej për mbasdite, me orën vendase, e megjithatë, arritja
e Papës u përshëndet me të shtëna topi nga aeroporti ushtarak. Më pas Françesku u
nis drejt nunciaturës apostolike të Seulit, ku kremtoi privatisht Meshën Shenjte,
për t’u nisur, menjëherë, në Pallatin presidencial, ku u organizua ceremonia e mirëseardhjes,
në Shtëpinë Blu. Këtu Papa bisedoi privatisht me presidenten Park, u takua me autoritetet
e mbajti fjalimin e parë. Françesku i nisi njëmijë kilometrat e shtegtimit e fjalët
e pritjes tani ua lënë vendin fjalëve të shpresës për ardhmërinë aq të pritur me paqe.
Koreja e mbarë Azia, janë gati ta dëgjojnë!