Ֆրանչիսկոս Քահանաապետը առաքելական ճամբորդութեամբ մեկնեցաւ Քորէա։

''Կանգնէ, լուսաւորուի՛ր, քանզի հասել է քո լոյսը, եւ Տիրոջ փառքը քեզ վրայ է ծագելու'' (Եսայի 60, 1-6)։

Չորեքշաբթի, 13 օգոստոս 2014-ի, յետմիջօրէին, սկիզբ առաւ Ֆրանչիսկոս Քահանայապետի առաքելական ճամբորդութիւնը դէպի հարաւային Քորէա, մասնակցելու համար` Ասիայի երիտասարդութեան 6-րդ օրուայ տօնակատարութիւններուն։

Նորին Սրբութիւնը սոյն ճամբորդութեան մասին յայտնած էր անցեալ 13 ապրիլ 2014-ին, կիրակնօրեայ Մարեմեան Աղօթքի ընթացքին։ Ֆրանչիսկոս Քահանայապետը երկրորդ Քահանայապետն է, Սուրբ Յովհաննէս Պօղոս Բ Քահանայապետէն ետք, որ հարաւային Քորէան կ՛այցելէ։ Մինչ Պօղոս Զ Քահանայապետը եղած է առաջին Քահանայապետը որ Ասիական ցամաքամասը այցելած է 1970-ին։

Սրբազան Հօր սաւառնակը` Հռոմի Ֆիումիչինօ օդակայանէն մեկնեցաւ ժամը 16-ին, ուղուելով Սէուլ ուր` 11 ժամ թռիչքէ ետք, հինգշաբթի 14 օգոստոսի առաւօտեան, կը ժամանէ Սէուլի օդակայան, տեղական ժամով` 10,30-ին (Հռոմի ժամով 03,45-ին - 7 ժամ տարբերութեամբ Սէուլի եւ Հռոմի միջեւ)։

Սէուլի օդակայան ժամանումին Ֆրանչիսկոս Քահանայապետը կը դիմաւորեն Սէուլի նախագահուհի` Տիկ Փարք Կէուն Հիէ, եւ քաղաքական ու Եկեղեցական պատկան իշխանութեան պատուիրակութիւնները մինչ երկու մանուկներ ծաղկեփունջ մը կը նուիրեն Քահանայապետին որպէս բարի գալուստի մաղթանք։

Օդակայանի պատւոյ սրահին մէջ նախագահին հետ հակիրճ հանդիպումէ ետք Ֆրանչիսկոս Պապը կ՛ուղղուի Առաքելական Նուիրակութիւն, ուր ժամը 12-ին կը մատուցէ սուրբ պատարագ եւ ապա յետմիջօրէի ժամը 15,45-ին (միշտ տեղական ժամով – Իտալիոյ ժամով` հինգշաբթի 14/8-ի 8,45-ին), կ՛ուղղուի Սէուլի նախագահական պալատի` "Blue House" պարտէզը, ուր զինք կը դիմաւորէ Սէուլի նախագահուհին եւ ''բարի գալուստի'' պաշտօնական արարողութեան աւարտին, Սրբազան Հայրը առանձնական հանդիպում կ՛ունենայ անոր հետ։

Ժամը 16,30-ին նախագահական պալատի ''Շունկմու'' սրահին մէջ, Նորին Սրբութիւնը հանդիպում կ՛ունենայ քաղաքական իշխանութիւններուն հետ անոնց ուղղելով ճառ մը։

Իսկ 17,30-ին (Իտալիոյ ժամով 10,30-ին – հինգշաբթի 14/8), Ֆրանչիսկոս Սրբազան Քահանայապետը հանդիպում կ՛ունենայ Քորէայի եպիսկոպոսաց համահաւաք դասի անդամներուն հետ, Սէուլի առաքելական նուիրակութեան կեդրոնին մէջ։
Յայտնենք թէ Ֆրանչիսկոս Քահանայապետը Քորէա կը մնայ մինչեւ 18 օգոստոս եւ իր կեցութեան ընթացքին պիտի հանդիպի Ասիայի երիտասարդներուն, Ասիական երիտասարդութեան ցամաքային վեցերորդ հաւաքի առթիւ, Երանելիներու շարքին պիտի դասէ Քորէացի 124 նահատակներ ու ապա խաղաղութեան եւ հաշտութեան սուրբ պատարագ պիտի մատուցէ Քորէական թերակղզիի միութեան եւ խաղաղաղութեան համար։