Ipeshkvijtë evropianë, Kombeve të Bashkuara: ndalojini mizoritë në Irak
Bashkësia Ndërkombëtare duhet të marrë urgjentisht vendime, për t’u dhënë fund akteve
mizore kundër të krishterëve e pakicave të tjera fetare në Irak. Kështu shkruan Këshilli
i Konferencave Ipeshkvnore të Evropës (CCEE), në një letër të hapur për Këshillin
e Sigurimit të OKB-së. Një kopje e saj do t’u jepet disa qeverive evropiane dhe autoriteteve
të Bashkimit Evropian, me kërkesën për t’u bashkuar me këtë thirrje. Ipeshkvijtë shpresojnë
që institucione të tjera kulturore e fetare ta ngrenë zërin kundër dhunimit të së
drejtës për të jetuar, të sigurisë e të lirisë fetare. Edhe në këtë letër, vihet
në dukje urgjenca e masave humanitare për të ndihmuar të krishterët dhe refugjatët
irakianë e për t’u siguruar atyre kthimin në shtëpi. Kisha Katolike në Evropë shpreh
afërsinë e saj me të gjithë ata, që po kalojnë çaste frike e terrori, duke i bërë
thirrje OKB-së të ndërhyjë sa më shpejt. Konferencat e veçanta Ipeshvnore të vendeve
evropiane janë bashkuar me këtë thirrje e po organizohen për të ndihmuar popullsinë
irakiane si përmes lutjes, ashtu edhe përmes solidaritetit konkret. Më 15 gusht, Kisha
Katolike e Francës dhe ajo e Italisë do t’i luten Zojës së Madhe për të krishterët
e Irakut dhe për të gjitha bashkësitë e Lindjes së Mesme, të cilat po përjetojnë Udhën
e Kryqit. Kujtojmë se edhe Kisha Katolike në Shqipëri ia kushton të dielën, 17 gusht,
lutjes për vëllezërit në fe, që persekutohen në Irak.