Kardinali Sandri: urgjente, ndërhyrjet për të ndaluar shpërnguljen e të krishterëve
nga Iraku e Siria
“Bota e qytetëruar, autoritetet publike dhe organizmat ndërkombëtare, duke parë situatën
tejet të rënduar, nuk duhet t’i vonojnë për asnjë çast ndërhyrjet e domosdoshme humanitare
dhe të të gjitha natyrave të tjera, për të ndaluar, posaçërisht në Irak e në Siri,
shpërnguljen e dhimbshme e të padrejtë të të krishterëve nga trojet, në të cilat banojnë
që prej dymijë vjetësh”: është thirrja e kardinalit Leonardo Sandri, prefekt i Kongregatës
për Kishat Lindore, i cili e falënderon nga zemra Papën Françesku “për afërsinë plot
kujdes prej ati, që u shprehu njëqindmijë të krishterëve të tjerë, të cilët u detyruan
mbrëmë, gjatë natës, të braktisin shtëpitë, kishat, fshatrat e rrafshit biblik të
Ninives e të ravgojnë drejt qytetit të Erbilit, në kushte të papërfytyrueshme, në
kërkim të një strehe e të një kafshate buke, ndërsa i pret para një ardhmëri krejtësisht
e paqartë. Jemi, pohon prelati i lartë, “përballë akteve kundër Zotit e kundër
çdo ndjesie njerëzore”. Në lidhje të vazhdueshme me patriarkun kaldeas Sako, me përfaqësinë
papnore në Bagdad e me ipeshkvijtë vendas, Kongregata për Kishat Lindore inkurajon
autoritetet përgjegjëse si dhe të gjithë ata, që e kanë për zemër fatin e të krishterëve
të Lindjes, të bëjnë, me ngut, atë që është më e domosdoshme për të lehtësuar vuajtjet:
pa ujë, pa ushqime, pa asgjë të domosdoshme për jetën njerëzore, posaçërisht fëmijët
e pleqtë po kalojnë çaste me pasoja tepër të rënda. Ekziston rreziku i një epilogu
katastrofik, nëse nuk do t’i jepet fund pasigurisë së përgjithshme, ndjekur me indiferencë
nga shumëkush, ndonëse aspak e panjohur, sepse e denoncuar vazhdimisht, nënvizon. Duke
shprehur dhimbjen e pamasë dhe indinjatën e barinjve dhe të besimtarëve lindorë katolikë,
të përhapur nëpër botë, kardinali Sandri i lutet përsëri, me gjithë shpirt, Zotit,
për popullsitë e dëmtuara rëndë nga dhuna barbare, në kundërshtim të plotë me dinjitetin
njerëzor. Shpreh edhe solidaritetin e thellë njerëzor e të krishterë ndaj këtyre njerëzve,
që kërkojnë, e meritojnë, ndihmë e mbështetje nga e gjithë bota.