Papa, Kalorësve të Kolombos: askush të mos e kufizojë Kishën në sferën private
“Feja na mëson se Kisha është e thirrur të jetë bashkësi vëllezërish e motrash, që
e pranojnë dhe kujdesen për njëri-tjetrin, duke shërbyer si tharm pajtimi e bashkimi
për krejt familjen njerëzore”. Ua kujton këtë Papa Françesku, Kalorësve të Kolombos,
mbledhur në Takimin e tyre të 132-të vjetor, i cili përfundoi sot në Orlando të SHBA-ve.
Ati i Shenjtë nënvizon impenjimin e Urdhërit në favor të të varfërve e të familjeve.
Tema e mbledhjes së sivjetme dy-ditore ishte “Do të jeni të gjithë vëllezër: thirrja
jonë është vëllazërimi”. Thirrje, nënvizon Papa në mesazhin e nënshkruar nga Sekretari
i Shtetit të Vatikanit, që organizata ka ditur ta mishërojë nga zanafilla e saj, në
fund të shekullit XIX. Papa vlerëson lart mbështetjen, që i japin Kalorësit, Sinodit
të ardhshëm të jashtëzakonshëm për familjen, i cili do të mbahet në tetor, si edhe
Takimit botëror të familjeve, në program në Filadelfia, në vitin 2015. “Familja –
përfundon mesazhi – është përnjimend mësuesja e parë e asaj vëllazërie, që e bashkon
dhe e ndërton shoqërinë mbi bazat e forta të respektit të ndërsjellë, të drejtësisë,
të mëshirës e të së vërtetës”.