Ըստ Ուքրանիոյ պաշտպանութեան Նախարարին. «Քիեւ շուտով յաղթանակ պիտի տանի երկրին հարաւ-արեւելքը»
ԻԹԱՐ-ԹԱՍՍ կը հաղորդէ, որ Ուքրանիոյ պաշտպանութեան նախարար Վալերի Կելեթէյ «Պի.Պի.Սի.»-ի
հետ ունեցած հարցազրոյցի ընթացքին յայտնած է, որ Ուքրանիոյ զինեալ ուժերու յատուկ գործողութիւնը
երկրին հարաւ-արեւելքը շուտով յաղթական աւարտ պիտի ունենայ: Նախարարը պատասխանելով
այն հարցումին, թէ արդեօք Ուքրանիոյ բանակը երկրին հարաւարեւելեան շրջաններուն մէջ յաղթանակ
արձանագրելու մօ՞տ է, ըսած է. «Ես հարիւր առ հարիւր վստահ եմ, որ շուտով յաղթանակ պիտի
արձանագրենք»: Նախարարը իր տեսակէտը մեկնաբանած է անով, որ ռուսամէտ զինեալներուն
կողմէ վերահսկուող տարածքները «այժմ 2,5 անգամ փոքր են, քան չորս շաբաթ առաջ»: «Տոնեցքի
եւ Լուկանսքի շրջաններուն մէջ ուքրանական ուժերուն միջոցով ազատագրուած է 16 քաղաք եւ
գիւղ: Մեր ուժերը կը գտնուին յարձակողական հանգրուանի մէջ», վստահեցուցած է Կելեթէյ: Ան
նշած է, որ յատուկ գործողութիւնը Ուքրանիոյ զինեալ ուժերուն կը տրուի «բարձր գինով»:
«Սակայն մեն այլընտրանք չունինք: Ուքրանիան կը նմանի այրող տան: Եթէ մենք զայն չմարենք,
ապա կրակը պիտի հասնի Քիեւ, ապա Խարքով, իսկ իբրեւ արդիւնք` ամբողջ երկիրը», վստահ է
նախարարը: