Ecclesiam suam e Palit VI mbush 50 vjet: Kisha në dialog me botën
50 vjet më parë, më 6 gusht 1964, Pali VI nënshkruante Enciklikën e tij të parë, titulluar
“Ecclesiam suam”. Në audiencën e sotme të përgjithshme, Françesku e kujtoi Papën Montini,
që shuhej 14 vjet pas këtij dokumenti, më 1978, pikërisht më 6 gusht, në Festën e
Shndërrimit të Zotit: “E kujtojmë me dashuri e admirim, theksoi, duke parë se ia kushtoi
gjithë jetën shërbimit të Kishës, të cilën e deshi me gjithë vetveten. Shembulli i
tij, si shërbëtor besnik i Krishtit e i Ungjillit, duhet të jetë inkurajim e nxitje
për ne të gjithë”. Ndërsa enciklika e tij e parë vijon të na kujtojë se “Jezu
Krishti e themeloi Kishën e tij për të qenë njëkohësisht nënë plot dashuri e të gjithë
njerëzve e dhuruese e shëlbimit”. E këto janë fjalët e para të enciklikës, të cilat
i japin, që në krye, tonin e dokumentit të frymëzuar plotësisht nga dialogu me botën.
Duke nisur nga vetëdija e identitetit vetjak, Kisha, pohon sidomos Pali VI, duhet
ta thellojë vetëdijen e misionit të saj transhendent e të kumtit, që duhet të japë.
Është detyra e ungjillëzimit. Është mandati misionar. E tregon më pas edhe metodën
e ungjillëzimit: “dialogun, afrimin me botën, ku Zoti na nxori në dritë, për t’i ofruar
dhuratat e së vërtetës e të hirit, që na i la në roje Krishti”. Gjithnjë në dialog.
E dialogu, sipas Palit VI, duhet të ndjekë katër kritere: qartësinë, sidomos; butësinë,
besimin e natyrën paqësore.