Святы Айцец зняў кананічнае пакаранне з вядомага святара і палітыка
Папа Францішак адмяніў
пакаранне суспэнсай у адносінах да 81-гадовага айца Мігеля Д’Эскота Брокмана. Святар
быў падвержаны кананічным санкцыям у 1980-я гг. за ўдзел у палітычнай дзейнасці. Ён
прыняў пакаранне ад самага пачатку і не выконваў душпастырскіх функцый, застаючыся,
аднак, членам сваёй місіянерскай супольнасці. Некалькі гадоў таму Мігель Д’Эскот Брокман
пакінуў палітычную дзейнасць. Ён напісаў ліст да Святога Айца, у якім выказаў жаданне
“перад смерцю” зноў цэлебраваць Эўхарыстыю. Пантыфік даў сваю згоду і папрасіў настаяцеля
яго супольнасці падтрымліваць субрата ў працэсе вяртання да святарскага служэння.
У
1970-я гады, ужо будучы святаром, Мігель Д’Эскот Брокман патаемна ўступіў ў Сандзінісцкі
фронт нацыянальнага вызвалення – левую нікарагуанскую партыю. Пасля яе прыходу да
ўлады Брокман стаў міністрам замежных спраў Нігарагуа і прабыў на гэтай пасадзе да
1990 г. У 2007 г. ён стаў дарадчыкам па міжнародных справах пры прэзідэнце Даніэле
Артэгу. У 2008 г. быў абраны старшынёй 63-й сесіі Генеральнай асамблеі ААН.