Libi. Kaedistët në veprim: të krishterët ikin nga Bengazi
“Të shtënat nuk kanë reshtur në afërsi të qendrës së qytetit dhe lëvizjet janë të
kufizuara, kryesisht për të krishterët”, njofton nga Bengazi ati françeskan Amado
Baranquel, i cili thotë se besimtarët “kanë frikë edhe të shkojnë në Kishë, sepse
druajnë se i rrëmbejnë”. Kohët e fundit “kanë zbritur një filipinas nga makina e ndërmarrjes
për të cilën punonte, sepse ishte i krishteri i vetëm, dhe i kanë prerë kokën”, njofton
rregulltari françeskan. Edhe kongregatat e motrave rregulltare janë detyruar ta
braktisin qytetin, për arsye sigurie. Motrat e Dashurisë së Zojës së Papërlyer të
Ivresë dhe ato të Kryqit të Shenjtë kanë kthyer në Romë, duke kaluar nëpër Tuniz.
“Dy prej motrave – njoftojnë nga shtëpia e eprores së përgjithshme të kongregatës
së Ivresë – janë kthyer të premten me një avion ushtarak, ndërsa gjashtë të tjerat
të shtunën, me fluturimin e linjës”. Motrat janë të trembura, por janë mirë. Të
krishterët kanë frikë për shkak të brigadave islamike me frymëzim kaedist, thotë atë
Baranquel, i cili saktëson se pjesa më e madhe e popullsisë vendase është kundër tyre.
Shpresa e vetme është formimi i një qeverie pas zgjedhjeve parlamentare të qershorit
të shkuar. Sipas të dhënave që dolën javën e kaluar, kandidatët laikë kanë marrë më
shumë vota se ata pranë forcave islamike.