Delegacioni i Kishës franceze në Irak: indiferencë e tepruar ndaj të krishterëve
Një delegacion i Kishës katolike franceze filloi sot një vizitë solidariteti tek të
krishterët e Irakut, ekzistenca e të cilëve është gjithnjë e më e kërcënuar nga lufta
dhe nga marshimi integralistëve të të ashtuquajturit Shtet islamik. Në Mosul, pas
gati 2000 vjetësh, nuk ka më të krishterë, sepse janë dëbuar me forcë nga shtëpitë
e nga qyteti. Delegacioni, i udhëhequr nga kardinali Philippe Barbarin, kryeipeshkëv
i Lionit, do të takojë, ndër të tjerë, patriarkun e Babilonisë së Kaldeasve, Louis
Raphael Sako I. Në këtë mision merr pjesë edhe ipeshkvi i dioqezës Evry-Corbeil-Essones
(Evri-Korbej-Eson), Imzot Michel Dubost, të cilin e intervistuam:
Nuk duhet
të lejojmë që vëmendja për sa po ndodh sot, kryesisht në Gazë, të na bëjë të harrojmë
se të krishterët e Lindjes janë duke përjetuar një çast tejet të vështirë. Dëshirojmë
t’u tregojmë këtyre vëllezërve e motrave se jemi solidarë me ta dhe duam të gjendemi
pranë tyre me gjithë zemër.
Ju denonconi indiferencën kundrejt përndjekjeve
që pësojnë të krishterët e këtyre vendeve...
Është e qartë se, meqë nuk ka
shumë pamje televizive, ndiqet vetëm gjendja në Gazë. Për Sirinë dhe Irakun nuk kemi
pamje televizive. Megjithatë, këtu, të krishterët vuajnë shumë, por flitet pak ose
aspak. Ajo që po përpiqemi të bëjmë është t’i njoftojmë njerëzit për këtë vuajtje.
Ju
thoni se bashkësia ndërkombëtare nuk është angazhuar për zgjidhjen e këtyre konflikteve...
Bashkësia ndërkombëtare, tashmë prej kohësh, po tregon pafuqinë e saj. Presidenti
Bush vendosi të ndërhynte në Irak, por hapi kutinë e Pandorës, duke bërë më shumë
keq se mirë. Sot “Kalifati” ka shumë para, shumë burime e shumë mjete. Kjo është me
të vërtet shqetësuese për paqen në botë. Duhet që fuqitë e mëdha të shqetësohen me
kohë, por nuk dinë çfarë të bëjnë. Ky është problemi.
Çfarë prisni nga ky
mision në Irak?
Pritjet tona janë shumë të qarta. Duam para së gjithash të
takohemi me këta njerëz, t’u themi se jemi pranë tyre shpirtërisht. Sigurisht, është
një ngushëllim i vogël, por, kur vuhet, është e rëndësishme të ndjesh se të tjerët
janë afër, pranë. I lutemi Zotit t’i ndryshojë zemrat. Nuk ka zgjidhje tjetër. Ne
shkojmë në Irak si të varfër, por të varfrit mund ta ndryshojnë botën.