Françesku në Kazertë: të shpresohet në Jezusin, të pranohen të papranuarit, të mbrohet
ambienti
Ftesa për të shpresuar në Jezusin, për t’i pranuar emigrantët e për ta shpëtuar Krijimin,
e edhe ftesa për të mos e pranuar veprimtarinë e paligjshme e, sidomos, korrupsionin:
këto, disa nga porositë më të rëndësishme, që u dha Papa besimtarëve gjatë Meshës,
kryesuar para Pallatit Mbretëror të Kazertës, në praninë e më se 200 mijë vetëve.
Pasi i falënderoi të pranishmit për mikpritjen e përzemërt, njoftoi se brenda vitit
do të jetë në Napoli.
Mos lejoni t’jua
vjedhin shpresën! Me këtë thirrje e përfundoi homelinë Papa, duke iu drejtuar dhjetra
mijëra besimtarëve të Kazertës, që e pritën për orë të tëra, edhe nën shi, të bindur
se Françesku do t’u fliste fjalë shprese, se do t’ua rikthente guximin e humbur në
ndeshjen e përditshme me një shoqëri, që vijon të bëjë hapa mbrapa në fushat më delikate
të jetës. Të gjithëve, Papa u kujtoi se shpresa është Jezusi, se është Zoti, thesari,
që e shndërron jetën e njerëzve, sapo ta gjejnë. Përmes shëmbëlltyrës së tregtarit
të pasur e të fshatarit të varfër e të pasurive, që zbuluan, margaritarit e thesarit,
Jezusi na mëson ç’është Mbretëria e Qiellit, si mund të gjindet, ç’duhet të bëjmë
për ta pasur, sepse nga të dyja shëmbëlltyrat, kuptojmë se Mbretëria e Hyjit bëhet
e pranishme në vetë Jezusin. Gëzimi i fshatarit e i tregtarit, kur i gjejnë këto thesare,
është i njëjtë me gëzimin e njeriut, që zbulon në jetë afërsinë dhe praninë e Jezusit: “Prani,
që e shndërron jetën e na bën t’ua hapim zemrën vëllezërve; prani, që fton për të
pranuar çdo prani tjetër, edhe atë të njeriut të huaj, edhe atë të emigrantit. Prani
mikpritëse, prani e hareshme, prani e frytshme. Kështu është Mbretëria brenda nesh”. Çdo
besimtar takohet në mënyrë të veçantë me Jezusin; njëri e kërkon, tjetri e zbulon
papritur e pa kujtuar, por gjithnjë, vijoi Papa, është Ai, që na kërkon. Ai ia krijon
mundësinë për ta gjetur, edhe atij, që nuk e kërkon, në vende të pazakonta e në kohë
të papritura: “E Jezusi është mes nesh. Ai është këtu, sot. E ka thënë vetë:
‘Kur mblidheni në emrin tim, unë jam mes jush!’. Zoti është këtu, është me ne, mes
nesh”. Gjindet në mënyra të ndryshme, por reagimi, si ta kesh gjetur, është
i njëjtë: mbetesh i mrekulluar, i pushtuar, i gatshëm për ta lënë plot gëzim jetën
e zakonshme, nganjëherë të thatë a të amullt, për ta rrokur Ungjillin, për t’u udhëhequr
nga logjika e re e dashurisë, e shërbimit të përvuajtur, pa kurrfarë interesi. Prej
këndej Françesku, ashtu si ka bërë edhe herë të tjera, i ftoi besimtarët ta kenë
gjithnjë pranë Ungjillin, për ta lexuar ditë për ditë një copëz prej tij: “Sa
nga ju e lexojnë çdo ditë një fragment të Ungjillit? E sa nga ju, ndoshta, nxitojnë
ta kryejnë sa më shpejt punën, për të mos e humbur telenovelën… Ta kesh Ungjillin
në duar, ta kesh Ungjillin mbi komodinë, ta kesh Ungjillin në çantë, ta kesh Ungjillin
në xhep, për ta hapur pastaj e për të lexuar Fjalën e Jezusit: kështu vjen Mbretëria
e Hyjit. Lidhja me Fjalën e Jezusit na afron tek Mbretëria e Hyjit. Mendoni mirë;
një Ungjill të vogël, gjithnjë me vete. Një Ungjill, që hapet rastësisht në njërën
nga faqet, e ti e lexon. Lexon ç’të thotë Jezusi. Jezusi është aty”. Por, për
ta shtënë në dorë Mbretërinë e Hyjit, vërejti Ati i Shenjtë, nuk mjafton entuziazmi:
duhet vënë Ai, në vendin e parë: “T’i japësh vendin e parë Hyjit, do të thotë
të kesh guxim t’i thuash jo së keqes; jo, dhunës, jo padrejtësive; do të thotë të
jetosh në shërbim të të tjerëve, të veprosh sipas ligjit, të mbrosh të mirën e përbashkët”. Kur
njeriu e zbulon Zotin, nuk mund të vijojë më të jetojë i mbyllur brenda vetes, nuk
e duron më egoizmin, kërkon ta ndajë me të tjerët dashurinë, që buron nga Zoti. Kush
bëhet mik i Hyjit, i do vëllezërit, lufton për ta shpëtuar jetën e tyre e shëndetin
e tyre, edhe përmes respektimit të mjedisit e të natyrës, vijoi Françesku, duke prekur,
më pas, një aspekt tejet të dhimbshëm të jetës të kësaj toke a, më mirë të themi,
të kësaj nëntoke, të helmuar nga mbeturinat …: “E di se vuani për këto gjëra.
Sot, kur arrita, një prej jush m’u afrua e më tha: ‘Atë, na jep shpresë’. Po unë nuk
mund t’ju jap shpresë, unë mund t’ju them se ku është Jezusi, atje është edhe shpresa;
ku është Jezusi, atje vëllezërit duhen, atje ndjehet fort impenjimi për ta mbrojtur
jetën dhe shëndetin e tyre, edhe duke respektuar mjedisin e natyrën. Kjo është shpresa,
që nuk të zhgënjen kurrë, shpresa, që jep Jezusi”. Toka juaj, vijoi Ati i Shenjtë,
kërkon kujdes e mbrojtje… “.. ju kërkon të merrni guximin e t’i thoni jo çdo
forme të korrupsionit e çdo forme të veprimeve të paligjshme. Të gjithë e dimë mirë
si quhen këto forma të korrupsionit e të shkeljes së ligjit. E kjo kërkon që të gjithë
të jenë shërbëtorë të së vërtetës e të zgjedhin, në çdo situatë, stilin ungjillor
të jetës, që shprehet në dhurimin e vetes e në vëmendjen për të varfrin, për të përjashtuarin.
Ta pranosh të varfrin, të papranuarin! Bibla është plot me thirrje të tilla. Zoti
na thotë: ju bëni këtë apo atë, pak rëndësi ka për mua. Ajo, që ka rëndësi para syve
të mi, është që jetimi të kujdesohet, vejusha të mbrohet, i papranuari të pranohet,
Krijimi të mbrohet. Kjo është Mbretëria e Hyjit!”. Në përfundim, Françesku
kujtoi se në Kazertë kremtohej festa e Pajtores, Shën Anës: “Mua më pëlqen ta
quaj gjyshja e Jezusit e sot është një ditë e bukur për të kremtuar gjyshet. Kur temjanisja,
pashë diçka tejet të bukur; shtatorja e Shën Anës nuk është e kurorëzuar, e bija,
Maria, është e kurorëzuar. E bukur, kjo. Shën Ana është gruaja, që e përgatiti të
bijën të bëhej mbretëreshë, mbretëreshë e qiellit dhe e tokës. Punë të bukur bëri
kjo grua! Punë të bukur”. Françesku i ftoi besimtarët ta jetojnë festën e Pajtores,
të lirë nga çdo kushtëzim, si shprehje e fesë së pastër të një populli, që e ndjen
veten Familje e Hyjit e fuqizon lidhjet e vëllazërisë e të solidaritetit. Ati i
Shenjtë u nda nga turma vigane popullore në festë të dyfishtë, me thirrjen: “Kini
shpresë, shpresa nuk zhgënjen. E mua më pëlqen të përsëris: mos lejoni t’jua rrëmbejnë
shpresën”.