Papa Kishës Britanike: mbrojeni jetën nga çdo brishtësi
Mbrojeni jetën kundër “kulturës së vdekjes” dhe çoni dashurinë e Krishtit në vendet
ku shfaqen “format e reja të varfërisë e të brishtësisë”. Kështu u shkruan Papa Françesku
katolikëve të Mbretërisë së Bashkuar dhe të Irlandës, të cilët më 27 korrik do të
kremtojnë Ditën e përvitshme për jetën. Letra është nënshkruar nga sekretari i shtetit
të Vatikanit, kardinali Pietro Parolin. Mos ktheni kurrizin, sepse “trupi i Krishtit”,
i vuajtur, është mes nesh. Të pastrehët, të droguarit, refugjatët, emigrantët e pleqtë
janë fytyra e varfërisë, që ka njëqind shprehi dhe të gjitha e sfidojnë ndërgjegjen
e krishterë. Papa Françesku e gdhend mendimin e tij me gërma të qarta në Evangelii
gaudium, numri 210, ku e fton Kishën të jetë “pa kufinj” dhe “nëna e të gjithëve”.
Një jehonë e qartë e këtij mendimi gjendet në Mesazhin e Papës për ditën kushtuar
jetës, që do të kremtohet në Angli, Irlandë, Skoci e Uells, me titullin “#livelife
mbroje dhe duaje jetën nga fillimi deri në fundin e saj të natyrshëm”. Papa Françesku
përmend një fragment nga thirrja apostolike Evangelii gaudium, dhe u drejtohet veçanërisht
të rinjve. Dita kushtuar “shenjtërisë së dhuratës së jetës, që vjen prej Hyjit, shkruan,
ju frymëzoftë “ta luftoni kulturën e vdekjes, jo vetëm duke punuar për të garantuar
mbrojtjen ligjore të së drejtës njerëzore themelore për të jetuar, por edhe duke u
përpjekur të mbartni dashurinë mëshirëmadhe të Krishtit, si balsami që u jep jetë
‘formave të reja të varfërisë e të brishtësisë’, shumë shqetësuese dhe gjithnjë e
më të pranishme në shoqërinë bashkëkohore”. Të ardhurat e ditës për jetën në Mbretërinë
e Bashkuar dhe në Irlandë do të përdoren për të ndihmuar strukturat e Kishës vendore
të angazhuara për mbështetjen dhe mbrojtjen e jetës.