Këshilli i Kishave: alarm për eksodin e të krishterëve nga Mosuli
Këshilli Ekumenik i Kishave u bashkua sot me alarmin e Patriarkut kaldeas Louis Sako
për eksodin e të krishterëve nga Mosuli, pas ultimatumit të së premtes nga ana e xhihadistëve
të Shtetit Islamik të vetëshpallur të Irakut e të Sirisë (ISIS), të cilët morën në
dorë qytetin muajin e kaluar. Në një deklaratë të publikuar dje, Sekretari i Përgjithshëm
i Këshillit, pastori Olav Tveit, kërkon solidaritet e lutje për popullin irakian e
sidomos, për pakicat e krishtera e myslimane, që detyrohen të largohen nga shtëpitë
e tyre. Të premten e kaluar, Patriarku kaldeas Louis Sako pati sqaruar se familjet
e krishtera janë drejtuar për në Kurdistan, duke nënvizuar se “për herë të parë në
historinë e Irakut, Mosuli është tani pa të krishterë”. Sipas tij, deri të enjten,
në qytet ndodheshin akoma rreth 25 mijë të krishterë. Pastaj, shënimi i shtëpive me
shkronjën “N” - që do të thotë “Nazareas”, siç quhen të krishterët në Kuran - si edhe
ultimatumi i xhihadistëve, shkaktoi ikjen e tyre në masë. “Është e trishtueshme
të shohësh fundin e pranisë shekullore të krishterë në Mosul”, komenton pastori Tveit,
i cili thekson se të gjitha Kishat janë të gatshme për dialog me bashkësitë e tjera
etnike dhe fetare, në mënyrë që të mbrohet pluralizmi i shoqërisë irakiane.