Нунцый: у Іраку хрысціян выганяюць з дамоў і забараняюць дапамагаць ім
Становішча хрысціян
у Іраку становіцца ўсё больш і больш драматычным, кажа Апостальскі нунцый у гэтай
краіне, арцыбіскуп Джорджыа Лінгва. Ён пацвердзіў паведамленні аб захопе джыхадзістамі
ў Масуле дамоў, якія належаць хрысціянам, а таксама ўвядзенне забароны на любую гуманітарную
дапамогу хрысціянам. “Вакол Масула і ў горадзе ўжо амаль няма хрысціян. Тых, хто застаўся,
мы просім, як мага хутчэй пакінуць гэты раён”, - сказаў ватыканскі дыпламат.
“Тут
сітуацыя сапраўды сур’ёзная: хрысціянам загадалі прыняць іслам або плаціць рэлігійны
падатак, якi спаганяецца з немусульман. У адваротным выпадку, яны павінны пакінуць
горад”, - сказаў іерарах і дадаў, што біскупы папрасілі невялікую групу паслядоўнікаў
Хрыста, якія ўсё яшчэ застаюцца на месцы, як мага хутчэй выехаць з горада. “Гэта ў
асноўным пажылыя людзі. На дамах многіх з іх ужо з’явіліся напісы “уласнасць ісламскай
дзяржавы”, - сказаў нунцый. Мінімальны памер штомесячнага рэлігійнага падатку складае
250 долараў ЗША. У цяперашняй цяжкай эканамічнай сітуацыі ў Іраку зарабіць такую суму
практычна немагчыма.
Паводле слоў арцыбіскупа, каля Масулу ўсё яшчэ жывуць
некалькі хрысціянскіх сем’яў, два манахі і брат з супольнасці св. Яфрэма. “На Нінэвійскай
раўніне, дзе ў асноўным хаваюцца хрысціяне, існуе складаная сітуацыя. Там вельмі высока
тэмпература паветра, адсутнічае вада і электрычнасць. Таму “Caritas” пачала працу
па капанні студні”, - падзяліўся Апостальскі нунцый у Іраку.
Групоўка “Ісламская
дзяржава”, якая ваявала да нядаўняга часу ў Сірыі, у чэрвені пачала наступленне на
паўночныя і заходнія раёны Ірака. Да яе далучыліся іракскія суніты, дробныя тэрарыстычныя
групы, ваенныя з былой арміі Садама Хусэйна. Групоўка абвясціла 29 чэрвеня 2014 г.
аб стварэнні ісламскага халіфата на падкантрольных ёй тэрыторыях у Іраку і Сірыі.
Халіфам быў абвешчаны лідэр баевікоў Абдала Ібрагім ас-Самараі, таксама вядомы як
Абу Бакр аль-Багдадзі. Самаабвешчаны халіфат у гэты момант працягваецца ад Алепа на
поўначы Сірыі да правінцыі Дыяла на ўсходзе Ірака.