Святы Пасад заклікаў мусульман да супольнага адказу на выклікі сучаснасці
“Дарагія браты і сёстры
мусульмане”, - такімі словамі пачынаецца пасланне Папскай рады па міжрэлігійным дыялогу
да вызнаўцаў іслама ў сувязі з заканчэннем Рамадана, “месяца посту, малітвы і дапамогі
бедным”. “На самой справе, хрысціяне і мусульмане з’яўляюцца братамі і сёстрамі ў
адной чалавечай сям’і, створанай Адзіным Богам”, - падкрэсліваюць аўтары. У пасланні
ўзгадваюцца словы св. Яна Паўла II да мусульманскіх рэлігійных лідэраў у 1982 г. Пантыфік
падкрэсліў у той час, што і хрысціяне, і мусульмане, “жывуць пад сонцам аднаго міласэрнага
Бога”, “вераць у Адзінага Бога, Які з’яўляецца Створцам чалавека”, “бароняць годнасць
чалавека як слугі Божага”. “Мы дзякуем Усявышняму за тое, што ў нас ёсць агульнага,
застаючыся свядомымі нашых адрозненняў. Мы ўспрымаем важнасць садзейнічання плённаму
дыялогу, пабудаванаму на ўзаемнай павазе і сяброўстве. Натхнёныя нашымі агульнымі
каштоўнасцямі і ўмацаваныя нашымі пачуццямі сапраўднага братэрства, мы пакліканы працаваць
разам для справядлівасці, міру і павагі да правоў і годнасці кожнага чалавека”, -
гаворыцца ў пасланні ватыканскай дыкастэрыі.
Аўтары звяртаюць увагу на ўзаемную
адказнасць хрысціян і мусульман за найбольш патрабуючых: “бедных, хворых, сірот, мігрантаў,
ахвяр гандлю людзьмі, і тых, хто пакутуе ад розных залежнасцяў”. Да такіх супольных
выклікаў належаць таксама: “пагрозы для навакольнага асяроддзя, крызіс сусветнай эканомікі
і высокі ўзровень беспрацоўя, асабліва сярод моладзі”. Не можа застацца без увагі
праблема бежанцаў. “Давайце працаваць разам, каб пабудаваць масты міру і садзейнічаць
прымірэнню, асабліва ў рэгіёнах, дзе мусульмане і хрысціяне разам пакутуюць ад жаху
войнаў”, - гаворыцца ў пасланні. Сучасны свет патрабуе сведчання, што “рэлігіі могуць
быць крыніцай гармоніі ў інтарэсах грамадства”.
У пасланні Папскай рады па
міжрэлігійным дыялогу гучыць заклік да малітвы, каб паяднанне, справядлівасць, мір
і развіццё занялі першае месца сярод прыярытэтаў чалавечай сям’і.
Адзначаецца,
што да пажаданняў далучаецца папа Францішак, які ў мінулым годзе асабіста падпісаў
падобны зварот.